Ragnar og Ingrid Helland var tidleg ute og sikra seg eit fint juletre på Rydland. Foto: Kjetil Rydland.

Øvrebygda 4H held oppe tradisjonen, og sel juletre ved Filialen på Rydland kvar dag i ei veke framover mot jul.

Joker-butikken på Rydland er nedlagt, men Øvrebyga 4H består, og i går ettermiddag opna juletresalet ved sida av «Filialen». Då salet opna fredag klokka 15, var berre åttteåringen Birgitte Sæbø på plass av 4H-medlemmene, men etter kvart seig det på med litt vaksnare 4H-jenter.

Heldigvis fekk ho god hjelp mor Karen Elisabet Sæbø, og av Nils Sveinung Fitjar, som kjempa om å bli årets første kunde. Noko han greidde, eit lite hestehovud føre Ragnar og Ingrid Helland, og Fitjarposten sin utsende.

I år sel Øvrebygda 4H kortreist edelgran frå Langeland på Stord. Prisen er den same for alle trea, den beine sum av 500 kroner.

I sterk kamp med Nils Sveinung Fitjar og ekteparet Ingrid og Ragnar Helland om å bli årets først kunde, oppdaga me at trea er ganske fine. Som vanleg er det lettare å finna vide enn smale tre. Her bør vera noko for ein kvar smak, men det er sikkert lurt å vera tidleg ute, for dei finaste trea går sjølvsagt først.

Heldigvis var betalingsterminalen på plass frå første stund. Elles tek dei naturlegvis imot kontantar. Serveringa var ikkje komen i gang då «butikken» opna, men etter kvart blei det både vaflar og kakao på frostige kundar.

Øvrebygda 4H reknar med å ha butikken open i morgon og kvar dag framover til og med fredag 21. desember. Juletresalet er ei av dei viktigaste inntektskjelene til 4H-klubben, og eit høgdepunkt for medlemmene. Det er kjekt å selja juletre!

 

- Annonse -