Både på laurdag og sundag vert det spennande program for 4-åringar i Fitjar kyrkje.

– På laurdag vert det vandring i kyrkja for alle dei som fyller 4 år i 2010. Det startar klokka 11. laurdag. Dei av borna som er medlemer eller tilhøyrige til kyrkja har fått skriftleg innvitasjon, men alle 4-åringane som vil kan komme, opplyser sokneprest Olav Oma til fitjarposten.no

Han fortel vidare at samlinga tek omtrent 1,5 time. På kyrkjeloftet vert det søndagsskule, kyrkjeklokka i tårnet vil ringa, orgelhuset og reidskapshuset opnar, og alle 4-åringane får prøvesitja preikestolen.

På sundag er dei same 4-åringane velkomne til å vera med i gudstenesta i kyrkja klokka 11. Bakken barnehage skal syngja, bygdekvinnelaget har pynta kyrkja til hausttakkefest, det vert dåp, og det vert utdeling av Mi kyrkjebok til dei som er fødde i 2006. Det blir også kyrkjesaft og kaffi begge dagane.