På eit skyttarstemne i Vindafjord i fjor, skaut fitjarbuen Svein Erik Vik 35 blinkar etter kvarandre, og oppnådde 350 poeng av 350 moglege. I går vanka det diplom og plakett.

Det var skyttarnestor Knut Vik som stod for den ærefulle utdelinga, og med dette resultatet er Svein Erik med i den eksklusive 350 klubben. Berre tre  skyttarar i Fitjar Skyttarlag har tidlegare oppnådd dette i den tida den har vore medlem i klubben. Desse tre er Leif Oddmund Tislevoll, Randi Beate Rydland og Asle Kvamsdal.

-Dette har vore eit mål heilt i frå eg begynte å skyte, smiler ein kjempenøgd Svein Erik Vik, som opplyser oss som ikkje er så godt inne i gamet, at skytinga gjekk føre seg på utebane, med 100 meters avstand til blinkane og med eit kaliber på 6,5.

Innom skyttarlaget får me òg vita at dei no er i gang med miniatyrskytinga som dei arrangerer kvar måndag, tysdag og onsdag, i fem veker vår og haust. -No er me komen til 2.veke, og det er endeleg plass til fleire om nokon ønskjer å ta del, seier Knut og Gisle Vik til fitjarposten.no

Ei kjærkomen gåve frå Sparebanken 1 i fjor, på 50 000 kroner, har gjort det mogeleg for klubben å investere i fire nye luftvåpen, så det er berre å møte opp i Fitjartunkjellaren, så ordnar det seg nok med å få skyte, om du skulle ha lyst å prøve deg du òg.