Johannes Sandvik Bø med aldersrekord for Fitjar Idrettslag i dag. Foto: FP-arkiv.

Fitjar har 13 unge og spreke friidrettsutøvarar i aksjon under Mailekene i Haugesund denne helga, og som vanleg leverer dei fine prestasjonar.

Aller best denne gongen gjekk det for Johannes Sandvik Bø (13), som sprang inn til ein sterk siger på 600 meter, på ny personleg rekord. Tida 1.44,07 er heile ti sekund under den gamle bestetida hans. Johannes kom også til finalen på 60 meter, der han sette ny personleg rekord, på 8,94, som heldt til femteplass.

Begge Marius-ane leverte som alltid gode prestasjonar. Marius Pedersen (12) kom til finalen på 60 meter, og sprinta inn til 3.-plass på personleg rekord på 8,76 sekund. På 600 meter kjempa han nok ein innbitt kamp mot erkerivalen Amund frå Uskedalen. Den velvaksne uskedølen vart også denne gongen litt for stor, i dobbel forstand, og kom i mål 35 hundredelar før vår mann, begge på 1.48-talet.

Marius Torbjørnsen (16) får stadig meir trøkk i tilløpet, noko som gir litt utfordringar i høgde, men 1,65 er framleis stabilt og høgst godkjent. I tresteg sette han personleg rekord med 11,65 meter.

Bjart Sandvik Bø (12) kom inn til femteplass i sitt heat på 600, med tida 2.06,05. Rekruttane og tiåringane Ole Jakob Wiik, Sunniva Wiik, Tori (10) og Olve Torbjørnsen, Thomas Sandvik, Gard Sandvik Bø, Guro og Jonas Dalen(10) og Sofie Bergesen gjorde sine saker framifrå i lengde og på 60 meter, rapporterer vår mann på friidrettsbanen, Bård Inge Bø.

Guro Dalen hoppar lengde. Foto: Privat.
Fitjar-rekruttane i Haugesund i dag. Foto: Privat
- Annonse -