Johannes Sandvik Bø med gullmedaljen i Parkløpet på Stord i dag.

Fitjarløparar vann tre av klassane under Parkløpet på Stord i dag, og oppnådde i tillegg ein andreplass i det mildt sagt skiftande vårvêret med sol og vadlasletta.

Fitjar stilte med ein liten tropp på berre fem løparar under Parkløpet ved prestegarden på Stord i dag. Men dei få som stilte, skulle visa seg å vera svært så slagkraftige.

På førehand hadde lærar Runar Øvrebø ved Øvrebygda skule utropt Maren Rydland (11) som storfavoritt på 600 meter i sin klasse, etter prestasjonane i gymtimane den siste tida. Maren skuffa ingen og var eit «hav» føre dei fem andre jentene i sin klasse frå Stord IL.

Bjart Sandvik Bø (11) disponerte løpet sitt fint og sprang inn til siger i sin klasse. Det same gjaldt Johannes Sandvik Bø (13). Halvor Aga (14) møtte sterk motstand på sin 800 meter, men greidde å spurta inn til ein flott 2.-plass opp dei sørpete bakkane på golfbanen.

Femtemann i troppen var Gard Sandvik Bø (8), som gjorde ein fin figur på 350 meter i rekruttklassen.

Bjart Sandvik Bø med gullmedalje om halsen.
Maren Rydland jublar over gullmedalje i Parkløpet, Kasper og Harald i bakgrunnen gler seg like mykje.
Halvor Aga smiler lurt etter å ha fått sølvmedalje i klassen sin.