Ikkje greitt å vera Torbjørn Korsvik og Svein Arne Raunholm i Fitjar-forsvaret mot Erlend Meling Nesse og Bremnes. Foto: Kjetil Rydland.

Som venta var Fitjar sjanselause i møtet med opprykkskandidat Bremnes på det fine heimegraset fredag kveld, og nådelause gjester gav seg ikkje før dei hadde nedsabla Fitjar med heile 5-0. 

Fitjar hadde ikkje mykje å stilla opp med mot Bremnes, og kom nesten ikkje til ein einaste målsjanse i heile kampen. Gjestene var best i alt, og hadde full kontroll frå første spark på ballen.

Bremnes hadde spel og sjansar, og kunne vunne meir enn 5-0

Etter eit kvarters spel var det klart for 1-0 til Bremnes, då Erlend Meling Nesse blei spela enkelt gjennom i midten. Han hadde ingen problem med å setja ballen bak veterankeeper Trond Henriksen i Fitjar-målet.

Litt seinare fekk nemnde Henriksen gult kort, då han tok ballen med hendene på femmeteren. For dommaren såg det ut som tilbakespel frå medspelar, men ikkje for oss andre, og slett ikkje for Trond Henriksen. Heldigvis valde veteranen å ta kortet og frisparket med godt humør.

Det indirekte frisparket kom det ingen ting ut av, men bremnesingane fekk rikeleg med nye sjansar. På slutten av første omgang kom Guttorm Kallevåg seg fri nede ved dødlinja og la fint inn på nærmaste stolpe. Der greidde André Fylkesnes å få ein fot på ballen, sjølv om det var ein Fitjar-forsvarar mellom han og målet.

Etter vel fem minutt av andre omgang var Daniel Skarpnes farleg frampå, men blei sparka ned av Bremnes-forsvarar Stian Habbestad Ytrøy. Sistnemnde blei utvist, men frisparket til Jonas Aleksandersen gjekk høgt over. Og Bremnes såg ikkje ut til å bli det minste svekka av å bli redusert til ti mann.

Kampen blei avgjort av to kjappe mål då det nærma seg midten av andre omgang, først ved Guttorm Kallevåg, og så ved Daniel Våge Nilsen. Utan at Fitjar var i nærleiken av å redusera, la Bremnes på til 5-0 ved Benjamin Gåsland Isaksen rett før slutt. Ei heilt fortent siger, som lett kunne vore endå større.

Ingen ting å gle seg over

Heller ikkje denne gongen var det mykje å gle seg over for heimepublikum. Den einaste som heldt nivået til Bremnes-spelarane, var lagkaptein Helge Myrmel Træet. Han blei heilt fortent utropt til dagens Fitjar-spelar. Det skal nok meir enn ein middag på Fitjar Fjordhotell til for å lokka fram det beste i dei andre Fitjar-spelarane.

Etter kveldens tap har lite forandra seg for Fitjar, som ligg på tredje sisteplass i 5. divisjon avd. 03. Heldigvis er det fleire lag som slit med å kapra poeng, men det begynner å hasta veldig for Fitjar å vinna kampar. Ny sjanse til poeng kjem borte mot botnlaget Inter Bergen fredag om ei veke. Neste heimekamp er mot Bønes laurdag 8. september.

Fitjar – Bremnes 0-5 (0-2)
seriekamp 5. divisjon avd. 03 Hordaland
Fitjar Idrettspark
Fredag 24. august kl. 19.00
Dommar: Charles André Gjessing Whiteley, Kalandseid IL
Gult kort: Trond Henriksen, Fitjar (21) og Lennart Andal, Bremnes (45)
Raudt kort: Stian Habbestad Ytrøy, Bremnes (51)
Publikum: 60

Mål: 0-1 Erlend Meling Nesse (15), 0-2 André Fylkesnes (37), 0-3 Guttorm Kallevåg (62), 0-4 Daniel Våge Nilsen (64), 0-5 Benjamin Gåsland Isaksen (90)

Fitjar sitt lag mot Bremnes: Trond Henriksen (Ruben Træet 75), Brynjar T. Engelsen (Lars T. Engelsen 61), Leif Tore Aarland, Helge Myrmel Træet (kaptein), Torbjørn Korsvik, Svein Arne Raunholm, Rezwan Kadir, Jonas Aleksandersen (Øyvind Fluge Rydland), Kristian Træet (Bernt Ove Maraas 57), Øyvind Fykse Lie og Daniel Skarpnes.