Ailin Vik vil ikkje skuffa supporterskaren sin, og gjer seg klar til å starta i landsfinalen i bilcross, som går av stabelen i Skien neste helg.

Den lovande bilcrossføraren vår Ailin Vik kvalifiserte seg til landsfinalen i bilcross allereie i første løpet i vår, og Fitjarposten tok det for gitt at ho skulle stilla opp.

Eit slikt syn er vanleg på motorbanane der Ailin deltar. Foto: Kjetil Rydland. 

Dette hadde lesarane våre fått med seg, og hadde begynt å ønskja lukke til i landsfinalen. Men Ailin fekk det ikkje med seg der ho var på ferietur til Bø i Telemark. Først då ho fekk kontakt med pappa Arild Vik midt i veka, fekk ho vita at folk ønskte henne lukke til i landsfinalen!

Der hadde ikkje Ailin tenkt å delta, for ho satsar på samanlagtsigeren i vestlandsmeisterskapet i år. Men ho har ikkje bilar nok til å satsa like mykje på begge delar. Som kjent kan du missa ein bilcrossbil på «auksjon» etter kvart løp. Ailin kunne ikkje risikera å bli ståande utan bil som duger i innspurten i VM, og derfor hadde ho bestemt seg for å droppa landsfinalen, sjølv om ho var kvalifisert.

Etter lukkeønskingane frå fjern og nær var gode råd dyre for Ailin, men dei er sjeldan for dyre for den uredde bilcrossføraren frå Øvrebygda. Ho brukte ikkje mange timane på å bestemma seg for å gjera eit forsøk. Ho tok kontakt med kjensfolk i bilsportmiljøet, som kanskje kunne skaffa ein høveleg bil til landsfinalen, og onsdag kveld fekk ho tilslag på ein bil i Ålgård.

- Annonse -

Tidleg på morgonen i går kopla ho hengar på bilen og køyrde åleine til Ålgård. Her kjøpte ho ein Opel Vectra med 2,5 liters motor til 13 000 kroner. I går kveld kom ho heim med bilen, og i dag er ho i full gang med å måla han om i klubbfargane til Fitjar Racing Team. På vegen heim var ho innom i Haugesund og fekk bilen godkjend. Ho har meldt seg på landsfinalen i Skien neste laurdag, men tar eit ørlite atterhald om lisensen for bilen går i orden. Ole Vidar Helland i Racingteamet ser ingen grunn til at det ikkje skal ordna seg.

I fjorårets landsfinale kom Ailin litt for langt bak i køen, for ho hadde ikkje motorkraft til å hamla opp med dei beste. Men med 2,5 liters motor og chip installert har ho mykje betre føresetnader.

Fitjarposten skjemst litt over dårleg kjeldekritikk då me skreiv at Ailin skulle delta i landsfinalen, men gler oss desto meir over at ho tok utfordringa på strak arm. Me ønskjer lykke til!

33,5 grader i skuggen: Lakken tørkar godt i dag, seier Ole Vidar Helland.