No kan fotballfolket kosa seg på danske strender eit par dagar. Arkivfoto FP/KR.

Fotballspelarane over i feriemodus i Danmark

Både jentelaget og gutelaget til Fitjar IL rauk ut av B-sluttspelet i Dana Cup i går, og no er det eit par dagars ferieliv før felles heimtur måndag. 

Både jentene og gutane frå Fitjar Idrettslag måtte nøya seg med B-sluttspel i Dana Cup denne veka. Jentene kom heilt sist i innleiingspuljen sin, med eitt poeng etter uavgjort mot Fet IL. Gutane klarte tredjeplass i innleiingspuljen etter uavgjort mot Teie IF.

Spesielt jentene hadde nok litt større ambisjonar, etter å ha vunne den heimlege serien klart i vår, og rykt opp til 1. divisjon. Men i Dana Cup møtte dei sterkare motstand, og var vel ikkje heilt heldige i kampar der dei viste mykje bra spel.

I 32-delsfinalen mot Fortuna Hjørring vann dei fortent 2-1, men allereie i 16-delsfinalen mot det gode laget Horsens, var det brått slutt. Danskane var altfor sterke og vann så klart som 3-0. Då hadde det begynt å tæra på spelarstallen til Fitjar etter at fleire av spelarane hadde begynt å slita med småskader.

Vår mann på sidelinja i Danmark konstaterer at jentene var heldige då dei greidde 1-1 mot gruppevinnar Fet onsdag, men at flaksen eller uflasen jamna seg ut etter kvart.

- Annonse -

Etter to klare tap for gutane, 0-7 mot Academia frå Guatemala og 1-5 mot Sandnes Ulf tysdag, blei det 2-2 mot Teie IF og 3.-plass i puljen. Men i torsdagens 32-delsfinale i B-sluttspelet var det over og ut.

Vår utsending på sidelinja fortel at gutane spelte ein god kamp, og dersom dei hadde scora først, kunne det blitt ein annan kamp. Fitjar-gutane viste godt lagspel, betre enn dei har fått til før i turneringa. Dei hadde spelet stort sett heile kampen og hadde to soleklare sjansar, utan å få ballen i mål. Men motstandarane Olsvik-Kjøkkelvik sette dei sjansane dei hadde, og kunne jubla for avansement etter 3-1 til slutt.

Dei fleste fitjarbuane har budd på Fyrklit Feriecenter like utanfor Hirtshals, der mange fitjarfolk har budd før. Ungdommane har budd på Vrå skole sør for Hjørring, i Vendsyssel kommune. Foreldra har skifta på å bu med ungdommane på skulen. Frokost har dei fått på skulen og lunsj og middag i Hjørring sentrum, så dei har brukt tida på å farta litt, seier vår utsende i Danmark.

No er den store Fitjar-delegasjonen i ferd med å avslutta Danmarks-turen med ymse ferieaktivitetar. Vêret er det same som her, rundt 30 varmegrader, og tørken har sett sitt preg på fotballbanane, mange er heilt brunsvidde.

I dag er dei fleste fitjarfolka i Fårup, og så blir det Legoland. Søndag er det fellesreise heim. Som så ofte før har Engevik & Tislevoll har lånt vekk minibussar, som har frakta spelarane hit og dit.


Brunsvidd: Slik såg det ut då Fitjar-gutane møtte Teie IF. Foto: Privat.