No kan Turid Fitjar forsyna kundane sine med tidlegpoteter frå Fitjargarden. Foto: Kjetil Rydland.

Fitjarpoteter i butikken

I dag begynte Turid Fitjar å ta opp poteter, og i morgon er det tidlegpoteter frå Fitjargarden å få kjøpt i SPAR-butikken.

Det var tidlegpoteter av typen berber Turid Fitjar begynte å plukka i dag. Hittil har ho plukka 200 kilo, og ho kan lova at dei vil bli å finna i hyllene til Odd Sverre Larsen på SPAR i morgon.

Dei andre tidlegpotetene på Fitjargarden heiter solist; dei òg vil bli å få kjøpt på butikken etter kvart. Både berber og solist kan òg køpast heime hos Turid på Fitjargarden. Som vanleg vil ho levera tidlegpoteter til Fitjarfestivalen, til den lokale maten som skal serverast i teltet på kaien.

I tillegg til tidlegpoteter har ho eit stort felt kerrs pink. Avlinga ser svært bra ut, sjølv om det har vore uvanleg lite nedbør i år. Med tanke på tørrote har vêret vore svært gunstig, og lauvet ser svært fint ut.

Potettradisjonen på Fitjargarden er gammal, og for Turid sin del er det no åttande sesongen ho har poteter som sommarjobb. Til dagleg er ho student på Norges Miljø- og Biovitenskapelige Universitet (NMBU). Her studerer ho plantevitskap, og blir ferdig sivilagronom om eit par år.

Kundane i SPAR-butikken har allereie etterlyst årets fitjarpoteter, seier Turid, men i morgon er ventetida over!

- Annonse -

Det er tørt på Fitjargarden i år, men potetavlinga ser bra ut. Foto: Kjetil Rydland.