Ho vil erstatte Terje Træet i sommarrevyen

Anne Marith Sandhåland erstattar Terje Træet i årets sommarrevy.

Terje Træet melder avbod til årets sommarrevy i Fitjar grunna helsemessige årsaker.

– I samband med at Terje Træet av helsemessige årsaker ikkje kan være med oss på scenen under årets sommarrevy kjem i staden Anne Marith Sandhåland inn for Terje, melder Sommarrevyen på Facebook.

Sandhåland er eit kjent ansikt for dei som plar å få med seg Fitjarrevyen. Ho har vore med på revyen to gongar tidlegare.

Sjølv om Terje Træet ikkje vil stille på revyen vil han merkast i materialet som skal framførast. Han har nemleg vore heilt sentral i tekstbidraga og jobben i forkant.

– Me kjem til å sakne Terje veldig på scenen og elles i teamet. Terje sitt tekstbidrag og jobb i førekant er likavel heilt avgjerandes for at det igjen blir revy.

Anne Marith har i 2017 og 2018 gleda Karmøy og Haugesundspublikummet gjennom sitt soloshow « Ein barnslige 50-åring», der 3000 billettar vart seld.

– Det er berre å glede seg til eit gjensyn med ein svært dyktig og modig revyaktør som har masse å by på!