Daniel Skarpnes t.v. med to mål mot Bønes. Foto: FP-arkiv/KR.

Uavgjort for A-laget mot Bønes

Fitjar sikra seg sitt første bortepoeng i årets 5. divisjon då dei spela 2-2 mot Bønes i Bergen fredag kveld.

 

A-laget kom godt i gang mot Bønes på bortebane fredag kveld, og allereie etter vel eit kvarters spel stod det 0-2 i Bergen. Begge scoringane kom på kjappe kontringar og fine framspel til storscorar Daniel Skarpnes.

Men vona om å gå til pause med ei tomålsleiing blei sløkt i sluttminuttet av første omgang. Lars Fitjar Waage laga sjølvmål etter eit knallhardt innlegg framfor mål.

– Det var uheldig å få mål imot på det tidspunktet, seier trenar Dikki Steensohn til Fitjarposten, men det var ingen tabbe frå Waage si side.

I andre omgang blei det tøft for gutane hans. Men dei spela disiplinert og viste ein fantastisk innsats, synest Fitjar-trenaren. Rundt 20 minutt før slutt utlikna Bønes, men Fitjar berga det eine poenget på god kjemping i sluttminutta.

– Og eitt minutt før sluttsignalet kunne me ha scora sigersmålet, seier Dikki, men Bønes redda på streken!

Han er likevel godt fornøgd med årets første bortepoeng. Det er gull verdt, det, meiner han, og gler seg mest over at det stadig går rette vegen for gutane hans.

Når kveldens bortepoeng blir registrert på tabellen i 5. divisjon, ligg Fitjar framleis på 8.-plass, midt i køen på nedre halvdel. Neste sjanse til poeng kjem førstkomande laurdag, heime mot Gneist 2.


BØNES 
– FITJAR 2-2 (1-2)

Fjellsdalen idrettsplass, fredag 4. mai kl. 20.00 – seriekamp 5. divisjon avd. 03

Mål: 13. min. 0-1 Daniel Skarpnes, 17. min. 0-2 Daniel Skarpnes, 44. min. 1-2 (sjølvmål Lars Fitjhar Waage), 70. min- 2-2.Dommar: Ruben Haugland,Tertnes Fotball

Fitjar sitt lag: Jacob Mehammer, Leif Tore Nesbø Aarland, Helge Myrmel Træet, Sander Hrafnsson Tverborgvik, Bernt Ove Maraas, Kristian Træet, Lars Fitjar Waage, Torbjørn Korsvik, Jonas Yang Tislevoll, Rezwan Mahammad Kadir og Daniel Skarpnes. Innbytarar med speletid: Svein Arne Jordan Raunholm og Markus Gerhardsen.