Fullt hus i Stranda bedehus på ein tidlegare Strandabasar. Foto: FP-arkiv/HCH. 

Kjem du på Strandabasaren komande laurdag?

Laurdag 21. april kl. 16.00 er det klart for ny basar i Stranda bedehus, og Stranda kvinneforening av NMS lovar ein basar av godt, gammalt merke.

 

No til helga er det igjen klart for Strandabasaren, den tradisjonsrike basaren som brukar å fylla bedehuset. Ikkje berre strandafolk, men folk fra heile i Fitjar – og ein god del stordafolk – har fylt bedehuset vår etter vår. Strandabasaren er ein basar av det gode, gamle slaget, og det er vel verdt å ta turen.

Som vanleg vert det andakt, allsong, solosong, åresal, sal på bok og noko å bita i. Håkon C. Hartvedt skal halda andakt og syngja. – Og så vil han gjerne fortelja eit og anna artig; det er alltid kjekt å høyra på, seier Tordis Eide i Stranda kvinneforening. Og som «alle år» er det John Karsten Raunholm som skal rista fram vinnartala. Og Bodil Nesse vil leia basaren.  

I fjor var det rekordinntekt på 72 694 kr på Strandabasaren, fortel Tordis Eide. Ho uttrykkjer stor takksemd over at dei kunne senda eit så stort beløp til Det norske misjonsselskap, som sjølv bestemmer kva dei bruker pengane til. NMS har arbeid i 13 land, fortel Tordis Eide. 

– Me er veldig glade for at folk sluttar opp om Strandabasaren, og vil takka alle som gir gevinstar og kjøper lodd og årar, seier Tordis Eide til slutt. 

 


Frå ein tidlegare Strandabasar, John Karsten Raunholm står som vanleg for trekninga. Framme med hekladuken står Edith Øvrebø. Arkivfoto FP/HCH.