Oliver André Matre med den siste finpussen på boblemotoren, som framleis ligg på golvet i verkstaden. Motoren skal vera på plass i bobla i god tid før han reiser til Bergen i morgon ettermiddag! Foto: Kjetil Rydland.

Sesongstart for bilsporten

Til helga er det sesongstart for bilsportfolket på Eikåsbanen i Bergen, og fem førarar frå Fitjar Racing Team stiller på startstreken. 

 

På grunn av kald og lang vinter blei NMK Vikedal nøydde til å utsetja første løpet sitt denne sesongen frå 21. april til 6. mai. Då vonar dei at vinteren har sleppt taket oppe i Vikedalsdalen, og at snøen og isen er smelta.

Men endå verre kunne det ha gått med sesongstarten, 7. april på Eikås Motorsportsenter i Åsane. Her har nemleg arrangøren mangla ny avtale med grunneigarane like til det siste. Den gamle leigeavtalen gjekk ut 1. april, og dette var slett ingen aprilspøk. 

I byrjinga av denne veka var faktisk det einaste fylkesanlegget for motorsport i Hordaland stengt, då grunneigarane ikkje ville forlengja kontrakten. Men etter at Bergen kommune var ute «på handletur», som Åsane Tidende uttrykker det, fekk dei til ein ny, midlertidig leigeavtale tysdag 3. april, slik at banen igjen er open. Dermed er det klart for sesongopning laurdag 7. april, med vestlandsmeisterskap og kvalifiseringsløp.

Frå Fitjar stiller nok Ailin Vik med størst vinnarsjansar i bilcross. Ho kunne stilt i seniorklassen i år, men har eitt år igjen blant juniorane, der ho no er blant dei eldste. Ho har hevda seg godt i fleire år allereie, og tar mål av seg å kjempe med dei beste juniorane i år og. 


Motoren til Oliver er ikkje komen på plass i bobla enno, men bileigaren ankar ikkje. Foto: Kjetil Rydland. 

Også senioren Oliver André Matre har store ambisjonar med ei av dei mange VW-boblene sine. Framleis ligg motoren på 2,1 liter og over 100 hestekrefter på golvet i klubblokalet til Fitjar Racing Team. Men Oliver er trygg på at motoren skal vera på plass i bobla og i topp stand før han reiser til Bergen i morgon ettermiddag. Sjølv om enkelte bilar har langt større motor, har han god von om å hevda seg blant dei beste. 

– Det er køyringa som avgjer løpet, seier han og smiler. 

For dei to andre bilcrossførarane, Ole K. Lønning og Joakim Strand, blir nok sesongopninga nærmast som trening å rekna. Dei har ikkje køyrt mykje løp før, og stiller som debutantar. Dei vil nytta løpa til å skaffa seg erfaring frå løpssituasjon. 

Fitjar har òg ein mann i rallycross; her stiller Håvard Helland opp i sin Volvo. Vanlegvis er det ikkje så mange på startlista i denne klassen her på berget, og han kjem nok høgt opp på resultatlista. 

Me lovar å sjå over pokalfangsten når dei kjem heim laurdag kveld. 

 


Vonleg vil dette merket visa godt igjen på bilsportbanane denne sesongen.