På Kringjen (ja, kor er no det?) kikkar hestehoven forsiktig fram i lyset. Foto: Kjetil Rydland. 

Hestehoven blømer – det er vår!

Sjølv om det er nattefrost og vinterføre i fjellet, er våren i anmarsj, og i dag dukka hestehoven opp.

 

Hestehoven er ein av dei første vårblomane våre, og eit sikkert teikn på at våren er i anmarsj. I dag kikka hestehoven forsiktig opp gjennom graset i vegkanten ved Gamle Sæterbøvegen.

At hestehoven blømer i slutten av mars, er så normalt som det kan kan bli. I fjor var han tre veker tidlegare, men då hadde me lite vinter. For to år sidan var han nesten like sein som i år. Hestehov i blomst er uansett eit gledeleg syn, og eit prov på at det går rette vegen.

Vanlegvis blomstrar hestehoven i perioden mars–mai. Han er ein av dei tidlegaste vårblomane. Når blomstringa er ferdig, kjem blada, store nyreforma rosettblad som står heile sommaren. Dei er 15–20 cm store, og kveler lett andre planter.

Hestehoven har mange namn, blant anna leirfivel og følfod (dansk), og på latin har han det velklingande namnet tussilago farfara.