Turid Lambach Fitjar utrusta for Alaska. Foto: Privat. 

Frå Fitjar til Alaska på fangst

Januar har vore ein travel månad, skriv Turid Lambach Fitjar, og i dag reiser ho til Alaska. Sjå kva meir ho skriv nedanfor: 

I starten av januar pakka eg skisko og sette kursen mot Alta Folkehøgskule og halvårskurset «Circum Polar Alaska». Her møtte eg sju andre unge vaksne, både med og utan tidlegare folkehøgskuleerfaring. Saman har me brukt resten av månaden til å planleggja og førebu oss på vårens store eventyr, tre månadar på tur i Alaska – «The Last Frontier».

 
Me har øvd på å grava oss ned i snøen, laga skikjelke og dradd kvarandre i djup snø, og koka kaffi og fyra bål. I tillegg har me hatt undervisning om både Alaska, polarheltar og snøskred. Ein stor del av planleggingsdelen handlar om å finna ut kor mykje mat me treng på turen.

 
Flyet over Atlanterhavet går 2. februar. Me landar i storbyen Anchorage, der me skal vera nokre dagar før me flyr vidare til ein liten landsby som heiter Takotna med 52 innbyggjarar. I ei lita fangsthytte utanfor Takotna skal me bu resten av februar. Sjølv om Takotna er lite, har dei postkontor der, så eit eksklusivt reisebrev til Fitjarposten kan vera mogleg å få til. 

 
I april skal me på loffen i Alaska, så om det er sambygdingar med kontaktar der borte hadde det vore spennande.

 
Reisehelsing Turid Fitjar