Kjøpmann Jan Stian Paule ved Rema 1000 Fitjar er ikkje framand for å gjere noko litt utanom det vanlege. Foto: Rema 1000

Rema 1000 med julestunt: skal halde ope heile natta før jul

Når Rema 1000 på Fitjar opnar dørene i morgon tidleg vil dei ikkje stenge butikken før klokka 23 på vesle julaftan.

 

– Me satt her ein dag og snakka om dette med mangel på tid, og då gjekk det plutseleg opp eit lys for meg. Kvifor kan ikkje me kome kundane våre i møte ved å gi dei litt betre tid og gi dei moglegheit til å handle kva tid det skulle passe, seier kjøpmann Jan Stian Paule.

Dermed er det duka for eit aldri så lite julestunt på Fitjar. Når Rema 1000-butikken opnar i morgon tidleg vil dei halde ope heile natta, og ikkje stenge butikken igjen før klokka 23 dagen etter, på vesle julaftan.

 

Første i Sunnhordland

– No har ikkje eg full oversikt over all galskap som har skjedd her opp gjennom tidene, men så vidt meg bekjent er me den første daglegvarebutikken i Sunnhordland som har hatt ope heile natta, seier kjøpmannen frå Os.

– Trur du det kjem mange folk i butikken midt på natta?

– Eg må heilt ærleg seie at eg har ingen fjernaste aning. Men dersom me kan hjelpe til med å gjere det enklare for to menneske ved å halde ope om natta så er det verdt det. Det er uansett rikeleg med anna arbeid for oss om natta.

 

Handelslekkasje

Kjøpmannen ser ikkje bort frå at stuntet kan vere med å trekkje litt folk til butikken som ikkje bur på Fitjar.

– Ja, kvifor ikkje? Me har veldig lyst å vise fram butikken vår til nye kundar. Så eg håpar me kan få litt handelslekkasje den andre vegen også. Dette er vår måte å ønskje god jul til kundane på, ved å vere litt vågale og smågalne.