Gutane jublar for puljesiger etter 8-2 i kveldens heimekamp. Foto: Kjetil Rydland.

G16 puljevinnar etter målfest

16-årslaget til Fitjar slo Trio/Halsnøy heile 8-2 på kunstgraset torsdag kveld, og kunne dermed jubla for puljesiger i årets 3. divisjon.

Førsteomgangen blei relativt jamspelt, med eit lite overtak til Fitjar. 1-0 kom på straffespark ved Jonas Aleksandersen, 25 minutt ut i kampen, etter at Markus H. Tislevoll hadde blitt felt. Eit par minutt før pause la straffeskyttaren på til 2-0 på eit kjempeskot frå rundt 30 meter. Ballen gjekk i ei høg boge over Trio/Halsnøy-forsvaret før han duppa og smatt inn i vinkelen. Eit typisk Jonas-skot.Heilt på slutten av omgangen kom gjestene til eit par farlege sjansar, men 2-0 til pause var fullt fortent.

 

Etter kvila skrudde Fitjar-gutane opp tempoet eit par hakk og spelte seg til store sjansar. I løpet av det første kvarteret scora dei heile fire mål, og dermed var kampen sjølvsagt avgjort. Daniel Skarpnes noterte seg for to mål, A-lagsspelar Marius H. Storebø eitt mål og den unge innbytaren Mats Vik eitt mål.

 

Sistnemnde blei dagens tredje tomålsscorar ei stund seinare. Han scora sikkert frå kort hald etter å ha blitt spelt elegant fri av ein annan tomålsscorar, Jonas Aleksandersen. Langpasninga er ei av dei finaste me har sett på Fitjar i år. Minuttet etter fekk ein annan ungdom, Jone Nysæther, gleda av å leggja på til 8-0 på eit flott skot som gjekk i ein fin boge frå 16-meteren og over heile forsvaret.

 

På slutten glapp det litt i Fitjar-forsvaret, og gjestene reduserte to gonger, til 2-8. Men det la ingen dempar på gleda til Fitjar-gutane. Men kveldens siger vann dei puljen sin i haust, G16 3. divisjon avd. 09, etter å ha gått gjennom serien utan tap. Me gratulerer med den flotte innsatsen.

 

 


Tomålsscorar Daniel Skarpnes, ung mann med auge for mål. Foto: Kjetil Rydland.

 

Fitjar – Trio/Halsnøy 2: 8-2 (2-0)
Seriekamp G16 3. divisjon avd. 09 Hordaland
Fitjar Idrettsplass, kunstgraset
Torsdag 27. oktober kl. 18.53
Dommar: Sulaiman Ali Rakhal, IL Solid

Mål:
1-0 Jonas Aleksandersen (straffe, 25.), 2-0 Jonas Aleksandersen (38.), 3-0 Daniel Skarpnes (50.), 4-0 Marius Helland Storebø (57.), 5-0 Daniel Skarpnes (60.), 6-0 Mats Vik (61.), 7-0 Mats Vik (74.), 8-0 Jone Nysæther (75.), 8-1 (79.), 8-2 (81.). 

Fitjar sitt lag:
Jacob Mehammer, Kristian Træet, Markus Gerhardsen, Svein Arne J. Raunholm, Jonas Moldskred, Markus Helland Tislevoll, Kristian Prestbø, Leander Reigstad, Jonas Aleksandersen, Marius Helland Storebø, Daniel Skarpnes. Innbytarar: Daniel Rolfsnes, Jakob Rolfsnes,  Elias Westerheim, Mats Vik, Andre Lønning, Jone Nysæther.