Dette kan visa seg å vera det siste sparket til Thomas V. Waage i årets 5. divisjon. Foto: Kjetil Rydland.

Fitjar-siger, men ingen jubel

A-laget vann 2-0 over nedrykksklare Erdal frå Askøy i det vakre haustvêret laurdag ettermiddag, men ingen jubla over sigeren.

Uinspirerte Fitjar-spelarar kunne knapt unngå å slå det svakaste laget som har gjesta Fitjar i år. Innsatsen og prestasjonane til heimespelarane var sterkt feieprega, og var ikkje eigna til å gleda verken trenar Kjell Træet eller publikum. I tillegg fekk storscorar Thomas V. Waage ein stygg kneskade, og blei boren av banen midt i andre omgang. Det var derfor ei tung stemning etter kampen, trass i at dagens trepoengar truleg sikra Fitjar plassen i neste års 5. divisjon.

Eit tamt heimelag hadde ingen problem med endå tammare gjester. Etter vel eit kvarters spel gav Kjell André Thorland Fitjar 1-0 på eit velplassert skot frå 20 meter. Det var vel den beste prestasjonen me såg i dagens kamp. To minutt seinare var Marius fint frampå og sette ein retur frå keeper i mål. I staden for 2-0 annullerte dommar Kjell Gudvangen, av uvviss grunn. I løpet av første omgang annullerte dommaren tre mål til, eitt for Erdal og to for Fitjar, alle korrekt. 


Kjell Andre Thorland avgjorde kampen med ei scoring og ei målgivande pasning. Foto: Kjetil Rydland.

 

Den som hadde venta at kampen skulle «ta av» etter pause, venta forgjeves denne gongen. Etter vel fem minutt av andre omgang, la Kjell André Thorland fint inn framfor mål. Øyvind Fykse Lie sette innlegget sikkert i mål. Men derfrå og inn var det ikkje mykje å gleda seg over i det fine spelevêret. Medan gjestene viste spel som høyrer heime i nedrykkssjiktet, spelte Fitjar seg til fleire store sjansar. Men avslutningane var ikkje mykje å skryta av denne gongen. 

Slutten på den litt labre framsyninga blei prega av skaden til Thomas V. Waage. Han vreid kneet stygt og måtte hjelpast av banen. I skrivande stund er det uvisst kor alvorleg skaden er, men det er vel usikkert om han er tilbake til dei siste kampane i årets 5. divisjon  No ventar tre tøffe kampar, mot Flaktveit, Sotra 2 og Bremnes. Men vonleg er dagens trepoengar nok til å sikra plassen i divisjonen.

 

Leif André Tangen får frispark for denne taklinga. Foto: Kjetil Rydland.

 

Dommar Kjell Gudvangen hadde ikkje spelarane heilt på lag denne gongen. Annulleringa av målet til Marius H. Storebø var feil. Elles overraska dommaren med å blåsa av kampen minst fem minutt for tidleg, uvisst av kva grunn. 

 

KAMPFAKTA

Fitjar – Erdal 2-0 (1-0)
Seriekamp 5. divisjon avd. 03
Fitjar Idrettspark laurdag 8. oktober kl. 15.00
Publikum: 85
Dommar: Kjell Gudvangen, IL Gneist

Mål: 1-0 Kjell André Thorland (16.), 2-0 Øyvind Fykse Lie (51.)

Fitjar sitt lag:
Aleksander Henriksen, Sander Tverborgvik, Torbjørn Korsvik, Helge M. Træet, André Helland, Kjell André Thorland, Øyvind Fykse Lie, Lars Fitjar Waage (Leif André Tangen 69.), Jonas Aleksandersen (Jan Åge Tislevoll 46.), Marius Helland Storebø (Markus Helland Tislevoll 46.) og Thomas V. Waage (Thomas S. Koløen 68.)