Anne Grete Langeland frå Dåfjorden var den mest lokale deltakaren me møtte på. Her følgjer ho og vorsteren Lucius nøye med på instruksjonane frå dommar Johan Fredrik Kayser før dei går ut i terrenget og ser etter orrfugl. Dei følgde tydelegvis godt med, for innsatsen blei lønna med tredjepremie. Foto: Kjetil Rydland.

Hundar på skogsfuglprøve fann orrfugl

Då Vestlandets Fuglehundklub skipa til skogsfuglprøve på Fitjarfjellet i helga, kom dei over mykje orrfugl, og mange av dei høgst kompetente hundane fekk premie.

Ved Olstjødno hadde leiaren av skogsfuglprøven, Karianne Kayser, slege leir søndag føremiddag. Ho fortel til Fitjarposten at ho har ansvaret for at 30 hundar frå fjern og nær får sjansen til å gjennomføra skogsfuglprøven for ståande fuglehundar i Fitjar denne helga.


Prøveleiar Karianne Kayser med den åtte år gamle pointeren Salsa, som ikkje får vera med på dagens prøve på grunn av ein skade. Foto: Kjetil Rydland.

Prøveleiaren frå Bergen, med hus på Stolmen, fortel at ho har deltakarar frå Sogn, Bergen, Os, Kvinnherad, Haugesund og her frå Stordøya. Alle dei vanlegaste ståande fuglehundane har vore representerte; breton, pointer, gordon setter, irsk setter, engelsk setter, korthåra vorster og stridhåra vorster med bart.

For å bestå prøven må førar visa at han har ein god jakthund, og det finst tre grader av bestått. Førstepremie blir gitt til ein svært god jakthund, andrepremie til meget god jakthund og tredjepremie til ein god jakthund, fortel Karianne Kayser. Førar og hund skal visa godkjent fuglearbeid på orrfugl og rugde, og konkurransen er for ståande fuglehundar, presiserer prøveleiaren. 

Alle hundane som er med, er vaksne, erfarne fuglehundar over to år. Kor lenge ein god jakthund kan halda seg på topp, er individuelt, blir me fortalt. Det varierer som med idrettsfolk, men jakthundar kan klara seg godt til dei er 10-12 år gamle. 

Erfaring kjem godt med under denne prøven, for den er ganske krevjande. Fleire tidlegare norgesmeistrar har snust rundt i Fitjarfjellet etter orrfugl denne helga. Og dei har skremt opp mykje fugl, i går kom dei over minst 60 orrfugl. Eit imponerande tal, spør du oss. Men så er det jo meisterhundar som har vore på ferde! 

Under denne konkurransen tar dei ikkje livet av fuglen, men skyt opp i lufta med ein signalrevolver. Saman med dommarane går dei ut i terrenget for å finna fugl, så skal fuglen ta stand (ståande fuglehund), og han skal setja seg igjen når du skyt på fuglen. Dette er det mest kritiske punktet, for då skal hunden sitja dønn i ro! seier prøveleiar Karianne Kayser. I det verkelege jaktlivet skal hunden henta fuglen utan å fara stygt med han, men dette får dei naturlegvis ikkje praktisert under denne øvinga. 

Laurdag fekk seks av 23 startande hundar premie. Søndag var det heile 10 av 22 hundar som fekk premie, av desse fekk fire førstepremie. Det er eit resultat som prøveleiaren seier seg veldig godt fornøgd med. Når over 20 % av hundane klarer prøven, er det bra, seier ho. Ho minner om at dei må finna fugl om dei skal klara prøven. I så måte er det som med anna jakt, utan vilt har du ikkje noko å visa for deg etterpå. I dag var det fleire som fann fugl, men dei sat ikkje nok i ro når fuglen gjekk opp til å få premie. 

Reglane for fuglehundprøvar finn du på nettsida til Fuglehundklubbenes Forbund her.

 


Eit slikt sauebevis må alle deltakarane ha med seg for å få vera med på prøven, seier dommar Svein Erik Bowitz. Så grunneigarane kan vera 100 % sikre på at desse hundane er sauereine. Foto: Kjetil Rydland. 

 

Dommar Svein Erik Bowitz fortel at jeger og hund i samarbeid skal visa viltfinnarevnene sine. Dei blir vurderte på fart, søk, breidde, format og bruk av vind. Dommarane er opptekne av at kontakten mellom jeger og hund er god heile tida. Hunden skal lystra føraren sin. 

– Tjuvracerar vil me ikkje ha! seier dommar Bowitz. 

Han presiserer at grunneigarane kan vera 100 % sikre på at hundane er sauereine. Har dei ikkje med seg sauebevis, får dei ikkje vera med på prøven, seier han. Dei samarbeider godt med grunneigaren, Fitjar fjellsameige, seier prøveleiar Kayser, rett etter at ho har hatt ein liten telefonsamtale med leiar Harald Rydland.

Fjellsameiga får naturlegvis tilbakemelding frå fuglehundklubben, Det er nyttig for grunneigar å vita kor mykje fugl dei finn, det fungerer som ei taksering av området, kor mykje jakt dei kan tillata. Er det lite fugl, er det sjølvsagt best å avgrensa jakta. Det er ikkje lurt å saga ned epletreet, då blir det ikkje eple til neste år, forklarer ein av dommarane.

Samarbeidet med Fitjar fjellsameige vore godt, og dei har hatt god kommunikasjon med lokale hjortejegerar, slik at dei ikkje har gått i vegen for kvarandre. Og dei har blitt særs godt mottekne av Fitjar Fjordhotell som har innlosjert dei på sportellet sitt ved Fitjar kultur- og idrettsbygg, og laga god mat til dei. Laurdag kveld var det jegermiddag på hotellet, med blant anna hjortekjøt frå Fitjar. 

Dei tilreisande jegerane var imponerte over den flotte utsikta utover skjergarden. Når dei i tillegg blei velsigna med det finaste haustvêret som tenkjast kan, kunne ikkje livet for jegerar og ivrige hundar vore betre.

 


Trond Inge Askvik frå Os med den irske setteren Guinness gjekk ut i terrenget klokka halv ni søndag morgon, og kan hund og førar jubla over førstepremie. Foto: Kjetil Rydland. 


Jan Sigve Sørhus og pointeren Pluto frå Haugesund fekk andrepremie etter hunden ikkje klarte å halda tempoet heilt inn. Men det var kanskje ikkje anna å venta, for hunden har vore slakk den siste veka, fortel eigaren. Foto: Kjetil Rydland.