Marius Helland Storebø konstaterer at han har lurt Halsnøy-keeper Magnus Eide og redusert til 1-2 for Fitjar. Foto: Kjetil Rydland.

Marius snudde kampen for Fitjar!

16-åringen Marius Helland Storebø kom inn på slutten av kampen, og med to scoringar sørgde han for at Fitjar snudde 0-2 til ein heldig 3-2-siger over Halsnøy i dag.

Ingen som hadde sett dei første 70 minutta av dagens kamp mot eit heiltent Halsnøy, ville satsa pengane sine på Fitjar-poeng. Men etter at Marius og eit par andre ungdommar kom inn frå sidelinja, snudde lukka for Fitjar, og med tre scoringar på slutten blei det tre poeng på heimelaget. 

Marius brukte berre to minutt på det same som dei eldre medspelarane hans hadde slite med i vel 70 minutt. Han oppfatta kjapt ein lovande situasjon utanfor 16-meteren til Halsnøy, og brått var han åleine med ein utrusande Halsnøy-keeper. Ballen gjekk i nettet, og dermed var det nytt liv i kampen, som såg ut til å vera tapt for lengst for Fitjar. 


Sander Tverborgvik på eit sjeldant besøk i Halsnøy-feltet i første omgang. Foto: Kjetil Rydland.

Første omgang av dagens prestisjeoppgjer mot Halsnøy er noko av det svakaste me har sett av Fitjar i år. Kjappe Halsnøy-bein var over alt der ballen var, bortelaget vann så godt om kvar einaste andreball og produserte den eine sjansen etter den andre. Det kunne sjå ut om om gjestene hadde førebudd seg godt heime på Nyamyro, og verka betre skodde enn nervøse og tamme Fitjar-gutar.

 


Lars Fitjar Waage med eit bra skot i første omgang. Foto: Kjetil Rydland.

Halsnøy brukte berre eit par minutt på å spela seg heilt gjennom Fitjar-forsvaret, men skotet gjekk heldigvis utanfor. Dét gjorde ikkje det flotte skotet til Ingvald A. Johnsen etter seks minutt, det fauk heilt opp i vinkelen, utanfor rekkevidda til Aleksander Henriksen i Fitjar-målet.

At det ikkje blei fleire Halsnøy-mål i første omgang, bør dei vaklevorne Fitjar-spelarane vera meir enn glade for. Sjølv produserte dei berre ein sjanse i løpet av heile første omgang. Etter ein halvtimes spel fekk Lars Fitjar Waage skikkeleg klem på eit skot frå 18 meter, men Halsnøy-keeperen leverte ei flott redning. Og endå kjappare var han på returen frå Øyvind Fykse Lie.


Leif A. Tangen med innlegg frå høgrekanten i første omgang. Foto: Kjetil Rydland.

Andreomgangen opna på verst tenkelege måte; Halsnøy gjekk opp til 2-0 etter eit par minutt. Fitjar såg ut til å gå på eit klart og smerteleg tap i prestisjeoppgjeret mot ein av favorittmotstandarane. Trenar Kjell Træet på sidelinja visste ikkje si arme råd, der han stod og såg på at spelarane hans blei rundspelte av skarpskodde gjester.

Men vel 20 minutt før slutt gjorde han eit særs vellukka byte. Med Arild Fitjar Waage og Marius Helland Storebø kom fleire unge og friske Fitjar-bein inn på den tunge grasmatta. Marius brukte berre to minutt på å gi nytt liv i kampen med den fine 1-2-scoringa si. Heile laget vakna til dåd, og leverte 20 minutt med god fotball, som var akkurat nok til å berga tre poeng.

Utlikninga til 2-2 kom på frispark frå vel 16 meter ved Kjell André Thorland, som på vanleg elegant vis skrudde ballen over muren og midt i mål. Og kort etter var Marius Helland Storebø frampå igjen og sette ein retur kontrollert i mål. Dermed blei 16-åringen dagens mann for Fitjar, som på nytt fekk gleda av å snyta Halsnøy for poeng på slutten av ein kamp. 

Trenar Kjell Træet er heilt klar på at 20 minutt med god fotball ikkje skal vera nok til å ta poeng, i ein kamp der ingen ting stemte for gutane hans før på slutten. Men desto meir gledeleg var det sjølvsagt å berga tre poeng mot Halsnøy på dramatisk vis. Og ikkje minst var det kjekt å sjå at ungdommen stormar inn på A-laget og markerer seg.

Jan Åge Tislevoll kjempa forgjeves mot Halsnøy-kapteinen Fredrik Eide i halvannan omgang. Foto: Kjetil Rydland.

Etter dagens heldige trepoengar held Fitjar godt følgje med laga på sikker plass i 5. divisjon. Neste helg møter dei overkommelege Erdal heime på graset i Fitjar Idrettspark. Det kan bli nødvendig med tre poeng i den kampen òg, for sesongen blir avslutta med tre tøffe kampar, mot Flaktveit, Sotra 2 og Bremnes. 

  

KAMPFAKTA

Fitjar – Halsnøy 3-2 (0-1)
Seriekamp 5. divisjon avd. 03
Fitjar Idrettspark laurdag 1. oktober kl. 15.00
Publikum: 45
Dommar: Simen Erdal Ones, IL Sandviken

Mål: 0-1 Ingvald Arneson Johnsen (6.), 0-2 Mats Paulsen (47.), 1-2 Marius Helland Storebø (71.), 2-2 Kjell André Thorland (78.), 3-2 Marius Helland Storebø (81.)

Gult kort: Øyvind Fykse Lie, Fitjar

Fitjar sitt lag: Aleksander Henriksen, Sander Tverborgvik, Nils Ingard Tislevoll (Arild Fitjar Waage 69.), Torbjørn Korsvik, André Helland, Leif André Tangen (Thomas V. Waage 57.), Øyvind Fykse Lie, Helge M. Træet, Lars Fitjar Waage (Jonas Aleksandersen 85.), Kjell André Thorland, Jan Åge Tislevoll (Marius Helland Storebø 69.)