Lagkaptein Svein Arne J. Raunholm spelte ein god kamp på midtstopparplassen sin. Foto: Kjetil Rydland.

Vêret stoppa ikkje fotballgutane

I prestisjeoppgjeret mot Solid torsdag kveld leverte 16-årslaget til Fitjar ein gjennomført god kamp, og sende gjestene heim att med 0-5 i bagen.

Førsteomgangen er noko av det beste me har sett av eit Fitjar-lag på fotballbanen i år. Med kulling og regn i ryggen gav dei gjestene sine skikkeleg bakoversveis. Fitjar-spelarane sette fart på ballen og produserte den eine fine målsjansen etter den andre. Og etter at Markus H. Tislevoll hadde gitt heimelaget 1-0 etter rundt eit kvarters spel, gjekk det berre ein veg. 


Markus Helland Tislevoll scora det første målet for Fitjar. Foto: Kjetil Rydland.

Dei andre scoringane i første omgang kom ved Marius Helland Storebø, Jonas Aleksandersen og Leander Reigstad. Og 4-0 var ikkje eitt mål for mykje etter spel og sjansar.

Etter pausen jamna spelet seg litt meir ut, og Solid yppa seg ved eit par høve. Men heimesigeren var aldri truga. For Fitjar blei det litt lenger mellom målsjansane, og den største til då kom eit kvarter før slutt. Ein Solid-forsvarar skaut knallhardt mot eige mål frå 16-meteren, men heldigvis var keeper på plass og hindra eit flautt sjølvmål. 


Fitjar-angriparar i fart mot Solid-målet. Foto: Kjetil Rydland.

Litt etter kom Fitjar sitt femte mål for kvelden på frispark frå Jonas Aleksandersen på 25 meters hald. Han fekk ikkje skikkeleg dreis på skotet, men fekk god hjelp av ein uheldig Solid-keeper som sleppte ballen mellom fingrane og i mål. Dermed kunne Fitjar jubla for 5-0, som òg blei sluttresultatet.

 

Fitjar sitt lag: Jacob Mehammer, Kristian Træet, Markus Gerhardsen, Svein Arne J. Raunholm, Jonas Moldskred, Marius Helland Storebø, Arild Fitjar Waage, Jonas Aleksandersen, Leander Reigstad, Markus Helland Tislevoll, Daniel Skarpnes. Innbytarar: Daniel Rolfsnes, Kristian Prestbø, Elias Westerheim, André Lønning, Mats Vik.


Den gamle Fitjar-venen Stein Erik Hagenes såg ut til å ta tapet med fatning. Foto:Kjetil Rydland.