Kyrkjelydsprest Fridleif Lydersen talar til store og små på Fodno. Foto: Kjetil Rydland.

Sol over tilskipinga på Fodno

Sola skein på godt over 200 små og store som fann vegen til Fodno søndag føremiddag for å vera med på Søndagsskulens dag, friluftsgudsteneste og andre aktivitetar.

Ein grå søndagsmorgon blei til ein mild og solfylt seinsommardag, til stor glede for både unge og gamle på Fodno i går. Etter kvart som folk kom i strie straumar i båtar over frå Fitjar sentrum, og opp til bakken ved den gamle skulen på Fodno, letta skydekket. Då det var klart for gudsteneste, skein sola over fellesarrangementet til Fitjar skulekorps, kyrkja, søndagsskulen og sogelaget.

Fitjar skulekorps overnatta i telt

Det driftige skulekorpset har hatt oppstartsseminar denne helga, og etter øvinga laurdag reiste dei ut til Fodno for å overnatta i telt. Leiaren i arrangementskomiteen, Lovise Vestbøstad, fortel at ho hadde med seg 39 musikantar på overnatting. Enkelte hadde aldri sove i sovepose og telt før, og søvnkvaliteten blei visst så som så, men det gjekk på ingen måte ut over prestasjonen under dagens gudsteneste. 


Eldsjel Helga Rimmereid i samtale med leiar i arrangementskomiteen, Lovise Vestbøstad. Foto: Kjetil Rydland. 

Eldsjel i skulekorpset og søndagsskulen, Helga Rimmereid, fortel at det er skulekorpset som har teke initiativ til dette arrangementet. Dei følgjer opp ein tradisjon frå dei siste åra med å invitera søndagsskulen på friluftsarrangement. 


Fitjar skulekorps spelar «Just a closer walk with me» medan ein del av søndagsskuleborna marsjerer inn. Foto: Kjetil Rydland.

Friluftsgudsteneste og søndagsskulens dag

Då klokka nærma seg 11, hadde godt over 200 fitjarbuar i alle aldrar funne vegen til knausane rundt den våte bakken ved skulen. Ved starten av gudstenesta marsjerte ein del av søndagsskuleborna inn, til akkompagnement av Fitjar skulekorps. Inne på bakken song dei søndagsskulesongane sine, dirigert av Elisabeth Moldestad, og med god hjelp av vaksne. Sokneprest Olav J. Oma var liturg, og kyrkjelydsprest Fridleif Lydersen heldt talen, om Den bortkomne sauen. Han gløymde ikkje å nemna at han sjølv kjem frå Færøyane, eit samfunn med 50 000 menneske og 70 000 sauer. 


Ein del av søndagsskuleborna kjem inn i prosesjon. Foto: Kjetil Rydland.


Kyrkjelydsprest Fridleif Lydersen talar til borna, og til alle oss andre. Foto: Kjetil Rydland.

 

Grilling
Skulekorpset stilte med grillar som var klare til bruk etter gudstenesta, og folk samlast til godt prat og grillmat i godvêret. Etterpå blei det ulike aktivitetar, blant anna var det laga natursti opp til den høgaste toppen på Fodno, Ramsberget, på 149 m.o.h. 

 

Flott omvising på Sørfodno

Ingebrigt Sørfonn er vaksen opp på Fodno, og viste seg ikkje uventa som ein ypparleg guide. Han tok med seg rundt 30 små og store på ei kulturhistorisk vandring med innlagde stopp langs vegen sørover og ned att mot sjøen. Han hadde mykje på hjarta undervegs, og gav ei levande skildring av sin eigen oppvekst i dette øysamfunnet, som talde rundt 50 menneske i hans barndom.


Ingebrigt Sørfonn hadde mykje å fortelja om Fodno, til glede for unge og gamle. Foto: Kjetil Rydland.

Etter ei slik levande skildring av Fodno i både i nær og litt fjernare fortid hausta Ingebrigt Sørfonn stor og velfortent fagnad. Rasmus Fitjar takka for innsatsen, og meinte det burde blitt skrive ned. Me er heilt einige, dette var svært kjekt å høyra på. 

Me takkar både Ingebrigt og dei andre for samværet, ikkje minst dei som stilte med båt og frakta oss trygt fram og tilbake.