Trond Henriksen veit å jubla for scoringar og poeng på fotballbanen. Foto: Kjetil Rydland.

Jublar for tre nye poeng!

Laga hadde kvar sin omgang då A-laget til Fitjar møtte Ask på Askøy fredag kveld, men takka vere god innsats av heile laget, drog Fitjar i land ein fortent 2-1-siger.

Fitjar dominerte første omgang mot eit heimelag som verka merkeleg avventande. Helge Træet og Øyvind Fykse Lie fekk god plass på midtbanen, noko dei visste å utnytta til å dominera kampen. Heimelaget måtte nøya seg med kontringar, mot eit solid Fitjar-lag. Men midt i omgangen kom dei til eit par farlege sjansar. Den første redda Markus H. Tislevoll på streken, korrekt plassert som han var borte ved stolpen. Den andre redda Nils Ingard Tislevoll ved den andre stolpen, rett framfor tåspissen til keeper Jacob Mehammer.  


Nils Ingard Tislevoll reddar i første omgang. Foto: Kjetil Rydland.


Thomas Vestbøstad Waage viste seg som ein skummel mann mot Ask på Askøy fredag kveld. Foto: Kjetil Rydland.

Det var heilt fortent at Fitjar kunne ta leiinga då vel halvtimen var gått. Thomas V. Waage fekk tak i ein retur etter corner, og skaut hardt og velplassert i mål. Scoringa kom som eit naturleg resultat av at Fitjar hadde hatt overtaket og pressa motstandarane til å gjera feil. 1-0 til pause var vel fortent, men Fitjar burde nok ha omsett overtaket i fleire scoringar.


Ein av dei beste på banen, Øyvind Fykse Lie, ser ut til å bli felt på 16-meterstreken, men han får ingen ting av dommaren. Foto: Kjetil Rydland.

Det hadde komme vel med, for det var eit heilt «nytt» heimelag som kom på banen etter pausen. Dei hadde tydelegvis brukt pausen godt, og la press på Fitjar frå første spark på ballen. Fitjar-spelarane såg ut til å vera litt overraska over forvandlinga til heimelaget, og svarte med ein del unødvendige feilpasningar på eigen banehalvdel. Noko som var med på å gi heimelaget blod på tann.

Etter kvart jamna kampen seg ut, med fleire sjansar til begge lag. For Fitjar var storscorar Thomas V. Waage i scoringsform denne kvelden. Han heada vakkert i vinkelen tidleg i andre omgang. Scoringa blei annullert for offside, truleg feilaktig. Ei stund seinare sette han ballen i stolpen frå kort hald. Det var såleis berre rett og rimeleg at det var han som avgjorde for Fitjar denne fine augustkvelden på Askøy. Innbytar Jan Åge Tislevoll spelte fram i feltet, der Thomas tok imot, og sende ballen knallhardt vidare i mål. 

Med fire minutt att av ordinær tid jubla Fitar-gutane for tre poeng, men det var litt for tidleg. Heimelaget sette inn ein kraftig sluttspurt, og utnytta at Fitjar-spelarane var litt uoppmerksame. Dermed kunne Daniel Lerum Bernhardsen koma gjennom og skyta hardt i mål, og gi ny spenning i kampen. Ask-spelarane gjekk inn i Fitjar-buret og henta ut ballen. Fitjar-spelarane skreik på gult kort, men dommaren hadde tydelegvis ikkje fått med seg denne sære og særnorske regelen, og let hendinga passera.

I dei hektiske sluttminutta såg det ut til at dommaren miste oversikta, og han oversåg situasjonar framfor begge lag sine mål. Dette gjekk like mykje ut over begge lag, og kampen ebba ut med 2-1 til Fitjar. Alt i alt ein velfortent siger til Fitjar, sjølv om det kunne ha glippa på slutten. Sigeren var ein typisk lagsiger, der alle kjempa godt heile kampen. Dei tre 16-åringane Jakob Mehammer, Marius H. Storebø og Markus H. Tislevoll leverte alle ein god kamp. For sistnemnde var det første gong han spela frå start i ein obligatorisk A-lamp. Det blir neppe siste gong. På slutten fekk me òg sjå ein debutant i serien, Sigve Hjelmen fekk med seg dei hektiske sluttminutta. 

Når kveldens trepoengar blir registrert, er Fitjar oppe på ein fin fjerdeplass på tabellen i 5. divisjon. Neste kamp er søndag om ei veke, heime mot Stord 2. 


Ein slik gapahuk til 100 tilskodarar, burde vel ha vore noko for Fitjar? Foto: Kjetil Rydland.


Blant dei 27 tilskodarane fann me to kjensfolk som heia på Fitjar. Foto: Kjetil Rydland.

Ask  Fitjar 1-2 (0-1)

Ask idrettsplass, Finamyren
fredag 19. august kl. 19.00
seriekamp 5. divisjon avd. 3 Hordaland

Mål: 0–1 Thomas Vestbøstad Waage (32), 0–2 Thomas Vestbøstad Waage (86.), 1–2 Daniel Lerum Bernhardsen (89.)

Gult kort for Fitjar: Øyvind Fykse Like (19.)

Publikum: 27

Dommar: Zoran Radojkic, Løv-Ham IL

Fitjar sitt lag: Jacob Mehammer, Emil Fitjar, Nils Ingard Tislevoll, Torbjørn Korsvik, Marius Helland Storebø (Leif André Tangen 75.), Helge Træet (k), Øyvind Fykse Lie, Kjell André Thorland, Markus H. Tislevoll (Jan Åge Tislevoll 68.), Jonas Tislevoll (Jonas Aleksandersen 82.), Thomas Vestbøstad Waage (Sigve Hjelmen 88.).