Lettare å få tak i taxi på Fitjar

 

 

– No er det berre å ringja, seier dagleg leiar Knut Ståle Alsaker og Svein Malvin Maraas i Fitjar Taxi. Foto: Håkon C. Hartvedt

Særleg i helgane har mange slite med å få tak i taxi på Fitjar. No går me mot mykje betre tider i så måte.

Fitjar Taxi satsar stort i heimbygda. Allereie no har dei tre taxiar, og seinare i haust kjem det ein til. Til dagleg vil dei alltid ha to taxiar på jobb, men ved større arrangement, og når dei veit at det er behov, kan dei stilla med alle fire.

– Så om du skal feire ein rund dag eller ha eit stort arrangement, og veit at det kan bli trong for fleire taxiar, er me svært glad for å bli tipsa om det på førehand, seier dagleg leiar Knut Ståle Alsaker til fitjarposten.no.

– Når me berre hadde ein taxi, seier det seg sjølv at det vart svært mykje venting for folk før dei fekk tak i taxi. Sist helg hadde me to taxiar på jobb. Ein måtte rett nok vente 20 minutt, men elles var det lite venting, legg han til. For ytterlegare å hindre ventetid, vil dei ha ein bil sør og ein nord i bygda.

Fitjar Taxi AS
Saman med Svein Malvin Maraas har han danna aksjeselskapet Fitjar Taxi AS. No har dei tre bilar. To vanlege personbilar, og ein stor som og kan ta rullestol.
Den fjerde bilen som kjem i haust er ein «8-seter», men denne har ikkje rampe.

God tru
Alsaker og Maras har god tru på at det nye taxiopplegget skal lukkast.
– Me har skulekøyring, sjukehuskøyring, lokal transport til sjukeheim og lege – og bra med turar i helgane. Fitjarbuen er i det heile flink til å bruke taxi, smiler dei.

– Lønsemda har vore god, og me vonar det vil fortsetje slik, seier dei til slutt – og inviterer til kaffi og kake, pluss rebus med premiar, ved taxikiosken i sentrum på laurdag under Fitjarfestivalen.