Anders på rett spor

Anders Halleråker Strand nærmar seg stadig A-finale i crosskart.

Den lokale crosskartføraren frå Fitjar har halde seg unna radaren vår i sommar, men han gjer stadig framskritt, og nærmar seg A-finale.

Små marginar, men nærmar seg A-finale
I NM-runden på Bjorli 4. laurdag juni var han svært nær A-finalen med sin 10.-plass samanlagt. Denne helga køyrde han på Rallebanen i Bø i Telemark. Her fekk han sisteplassen i B-finalen etter å ha fått marginane mot seg på slutten.

I det fine løpsvêret laurdag var Anders nærmare A-finale enn nokon gong i 650 ccm-klassen. Det tredje innleiingsheatet leia han lenge, og ein siger her ville gitt plass i A-finalen. Men han var uheldig og drifta ut i ein sving, slik at han miste førsteplassen og dei 10 poenga han trong. Med sju poeng for andreplassen blei det B-finale.

Frå 2.-sporet i B-finalen kom Anders godt ut, men hekta i køen i første sving. Der blei det full stans, og han kom seg ikkje til mål. I staden for å kjempa om sigeren, og plass i A-finalen, måtte Anders nøya seg med sisteplassen i B-finalen.

På den vanskelege Rallebanen i Bø viste Anders god køyring, men måtte konstatera at han må ha marginane med seg for å nå opp. Det er mange tøffe førarar i eit slikt beite. Trass i litt sportsleg motgang er både Anders og pappa Ingve André Strand fornøgde med turen.

Karten fungerte som han skulle utan tekniske problem.
– Me begynner å få oppsettet til no, seier faren, bank i bordet!!

Sosial sport
Sosialt var det òg ein kjekk tur, seier dei. Martin og Hildegunn Strand er trufaste støttespelarar, og dei møtte tidleg opp i Bø for å sikra teamet god plass i depotet. Denne gongen hadde fitjarbuane selskap av to andre førarar frå Vikedal-klubben. Både Bjørn Cato Aarekol frå Vikedal og Hauk Hamre Hagen frå Etne køyrer i 125 ccm-klassen.

Me delte telt og grill med dei, seier Ingve André. Det er naturlegvis ekstra sosialt og kjekt når ein heil gjeng er samla. Med på laget sitt har dei òg fått Fredrik Helland som hjelpesmann. Og sist, men ikkje mist, den nye føraren i teamet. Det er Liam, men han veit ikkje om det, for han har ikkje fylt eitt år enno!

Førebur seg til neste NM-runde
Neste løp er i Skien første helga i august, og då blir det nok endå tøffare. Som det går fram av terminlista, gjeld denne NM-runden også i NEZ Cup, så her blir det ganske sikkert stor deltaking frå heile Skandinavia.

Før den tid reknar teamet med å komma seg til Vikedal på trening. Karten er meir eller mindre klar til dyst igjen. Ingen store reparasjonar trengst, det er berre snakk om småting som oljeskift og vasking. Både Anders og Ingve André er overtydde om at det blir A-finale før sesongen er omme.
Anders er heilt klart på rett spor!