Kjell André Thorland gav Fitjar 1-0 i slutten av første omgang, men det heldt ikkje heilt inn for Fitjar i dag. Arkivfoto FP/KR. 

Poengdeling for A-laget på Halsnøy

A-lagsgutane til Fitjar berga eitt poeng i sommarvarmen på Halsnøy fredag kveld.

Sist dei to laga møttest på Nyamyro på Halsnøy var hausten 2013. Då rana Fitjar til seg tre poeng etter to mål i sluttminutta, og var med det nesten klare for 4. divisjon. Referat frå den kampen kan du lesa her

Etter fjorårets nedrykk måtte Fitjar igjen ta turen inn til Halsnøy i dag. Me fekk ingen repetisjon av 2013-ranet, men Fitjar berga eitt viktig poeng mot eit av laga som dei bør ha bak seg når rekneskapens time slår ein gong til hausten.

Fitjar spela ein bra første omgang, etter det me forstår på trenar Kjell Træet. Og eit par minutt før pause var det klart for 1-0, på ei perle av eit mål frå foten til Kjell André Thorland. Øyvind Fykse Lie slo eit frispark inn i feltet. Kjell André let ballen dabba ein gong, før han klemte til på heil volley. Pang i nettet!

Dermed kunne Kjell Træet sine menn gå til pause med 1-0, men i andre omgang blei det litt tyngre. Det blei lite fint spel frå nokon av laga, mykje kriging og lemping av ballen. – Slik det plar vera når me spelar på Halsnøy, seier Fitjar-trenaren.

Vona om å stå løpet heilt ut brast 10 minutt før slutt. Etter klabb og babb i feltet klarte Halsnøy å overlista Oddgeir Træet, sjølv om Fitjar-keeperen hadde ei hand på ballen. Med 1-1 ebba kampen i sommarvarmen ut, og sluttkjørte Fitjar-gutar må vera fornøgde, etter det me forstår på trenaren.

– Slik kampen utvikla seg, må me vera fornøgde, seier Kjell til Fitjarposten. Denne gongen skryt han litt ekstra over midtstoppar Torbjørn Korsvik, som var flink å vinna duellane. Elles er Fitjar-trenaren glad for at laget hans har slutta å tapa kampar. Akkurat denne kampen var ein av dei som var særs viktig ikkje å tapa.

No er Fitjar oppe i 14 poeng på tabellen i 5. divisjon, framleis med ein viss avstand til dei svakare laga i puljen. Svake er neppe Flaktveit, som Fitjar skal møta i neste kamp, heime i Fitjar Idrettspark fredag 10. juni.

 


Som vanleg sat Jan Åge Tislevoll ringside og heldt Facebook-vener ajour med utviklinga i kampen. Arkivfoto FP/KR.

 


Øyvind Fykse Lie kan ta gode frispark. Arkivfoto FP/KR.

 

Halsnøy – Fitjar 1-1 (0-1)
Halsnøy idrettsplass
Fredag 3. juni kl. 17.50
Seriekamp 5. divisjon avd. 03 Hordaland

Mål: 0-1 Kjell André Thorland (43), 1-1 (80.)

Dommar: Kjell Gudvangen, IL Gneist

Fitjar sitt lag: Oddgeir Træet, André Helland, Torbjørn Korsvik, Nils Ingard Tislevoll (Mats Westvik 63.), Sander Tverborgvik (Leif André Tangen 46. Jonas Aleksandersen 86.), Øyvind Fykse Lie, Kjell André Thorland, Helge Myrmel Træet (k), Badi Hurasi (Marius Helland Storebø 83.), Jonas Tislevoll, Sebastian T. Thomassen (Arild Fitjar Waage 78.).