– Beste skulen eg har gått på

Denne skulen må for all del ikkje leggjast ned. Det sier elevane f.h. Morten Petterteig, Janne Lima og Thomas Iversen. Foto: Håkon C. Hartvedt

Orda i tittelen kjem frå Thomas Iversen frå Austevoll, og han blir godt backa opp av to andre elevar: Morten Petterteig og Janne Lima. – Fitjar vgs må for all del ikkje leggjast ned.

Thomas pendlar til Fitjar frå Austevoll. Må opp grytidleg kvar dag. Men det gjer han gjerne. – Eg gler meg til kvar dag eg får gå på denne skulen. Her er det samhald. Lærarane ser oss, og ser kva for behov me har. Eg har aldri kjent meg så godt teken vare på som her. Og mobbing har eg rett og slett ikkje observert noko av på denne skulen, seier han i møtet der òg fylkesvaraordføraren er til stades.

Morten Petterteig frå Stord fortel at han lett kunne hamna på vidaregåande skule på Stord, men at han valde Fitjar vgs. Skulen på Stord har ikkje den sjarmen som Fitjar vgs har. Her er skulen så liten at me til og med kan sjå, og bli sett av, rektor i kantina. Her får eg god kontakt med andre. Skulen er liten, men det er ein god skule.

Janne Lima bur òg på Stord. Tidlegare har ho gått tre år på vidaregåande skule i Sandnes. Den skulen var for stor.

– Det er noko heilt anna å gå her. Her blir eg mykje meir sett. I Sandnes vart det fort grupperingar. Grupperingar som var verande heile skuletida ut. Då er det vanskeleg. Men her er det kjempebra miljø, skryt Janne, til slutt.