1-0 til Fitjar. Øyvind Fykse Lie fintar ut Rosendal-keeperen, Frank Mehl, og scorar kontrollert på straffe. Foto: Kjetil Rydland.

Tre poeng mot botnlaget Rosendal

Fitjar vann fullt fortent 5-2 over botnlaget Rosendal i Baronibygda laurdag ettermiddag.

Fitjar sløste med sjansane mot botnlaget Rosendal, men vann til slutt så klart som 5-2 i vindrosene i Baronibygda. Også denne gongen spela Fitjar ein bra første omgang, og leia 3-0 ved pause. Men den som hadde trudd at kampen var avgjort med det, måtte tru om att.

Etter pausen kom som vanleg Fitjar-gutane vaklande ut av garderoben på nervøse og ustø bein, og brukte berre sekund av andre omgang på å invitera Rosendal inn igjen i kampen. Hermund Døssland fekk litt for god tid til å stilla inn siktet, og scora eit flott mål frå langt hald, heilt oppe i vinkelen. 


Kaptein og spelande trenar for Rosendal, Jan Evald Såtendal, feller Emil Fitjar bakfrå og pådrar seg straffespark. Foto: Kjetil Rydland.

Dermed var det full dramatikk igjen, i ein kamp som Fitjar burde ha teke livet av før pause. Gutane til Kjell Træet hadde kontrollen og burde ha scora langt meir enn tre mål i løpet av dei første 45 minutta. 1-0 kom straffespark ved Øyvind Fykse Lie, etter 18 minutt. Emil Fitjar blei felt bakfrå av kaptein og spelande trenar Jan Evald Såtendal, og straffesparket var klart nok.

Berre fem minutt seinare var det Helge Træet sin tur. Han fekk tak i ein retur etter corner, og scora knallhardt frå 10-12 meters hald. Med 3-0 etter 35 minutts spel tyktest kampen avgjort. Jonas Tislevoll kom på eit fint løp og var brått åleine med keeper, som redda skotet hans frå kort hald. Men Jonas fekk tak i ballen igjen, og la inn til Thomas Vestbøstad Waage framfor mål. Storscoraren kunne ikkje unngå å treffa; noko meir ferdigscora har me sjeldan sett.

Nesten ferdigscora var det for Torbjørn Korsvik òg ved eit par høve rett før og etter 3-0-scoringa. Men Torbjørn ser ut til å ha gløymt kor lett det var å scora før. Fitjar hadde kontrollen heile første omgang, og kunne lett ha leia med minst fem-seks mål til pause. 3-0 verka betryggande nok, men det var før Fitjar-gutane hadde vore i garderoben.

I første del av andre omgang vakna eit slagent heimelag til dåd, og reduserte til 1-3 og 2-3 ved Hermund L. Døssland og Torbjørn Steinsvik før det hadde gått 20 minutt. Midt i omgangen stod faktisk kampen og vippa i nokre minutt. Usikkert forsvarsspel av Fitjar ga Rosendal fleire stygge sjansar til å utlikna. Keeper Oddgeir måtte henta fram fleire fine redningar for å berga laget sitt.

Men etter 25 minutt var det meste avgjort, då Fitjar gjekk opp til 4-2. Thomas kjempa til seg ballen på venstresida og gjekk mot mål, før han la fint inn til Jonas Tislevoll, som scora sikkert. Målet kom vel med for laget, og sikkert også for Jonas, som eit par minutt tidlegare hadde bomma for ope mål. Etter at Oddgeir hadde henta fram fleire redningar til, fekk Thomas V. Waage gleda av å setja inn 5-2 for Fitjar. Han gjekk på tvers i Rosendal-feltet og fekk ballen tilbake frå Badi Hurasi, før han smelte ballen i mål. 

5-2 mot Rosendal gav tre kjærkomne og velfortente poeng. Men korleis dei kunne invitera botnlaget inn att i kampen, er ikkje til å forstå. Kva Fitjar-gutane gjer i pausen, veit me ikkje, men me må ha lov å lura. Heldigvis slapp dei med skrekken denne gongen, først og fremst takka vere godt midtbanespel av Øyvind Fykse Lie og Helge Træet, og ein aktiv Thomas V. Waage i angrepet. Elles er det kjekt å sjå at 16-åringen Arild F. Waage klarer seg godt på dette nivået. 

Når dagens trepoengar tikkar inn på tabellen, kjem Fitjar opp i 10 poeng og ligg på femteplass i 5. divisjon. No ventar Laksevåg på heimebane laurdag om ei veke. 

 


Thomas Vestbøstad Waage med to scoringar mot Rosendal. Foto: Kjetil Rydland.


Jonas Tislevoll med ein assist og eitt mål, men det kunne lett blitt fleire mål. Foto: Kjetil Rydland.

Rosendal – Fitjar 2-5 (0-3)
Rosendal stadion
Laurdag 21. mai kl. 14.55
Seriekamp 5. divisjon avd. 3 Hordaland
Publikum: 60

Mål: 0-1 Øyvind Fykse Lie (str. 19.), 0-2 Helge Træet (24.), 0-3 Thomas Vestbøstad Waage (36.), 1-3 Hermund Døssland (46.), 2-3 Torbjørn Steinsvik (64.), 2-4 Jonas Tislevoll (70.), 2-5 Thomas Vestbøstad Waage (80).

Gule kort: Dag Rune Myklebust (51.) og Espen Seberg Åkra (26.), Rosendal; Arild Fitjar Waage (59.) og Thomas V. Waage (65.), Fitjar

Dommar: Frode Wold, Lysekloster IL

Fitjar sitt lag: Oddgeir Træet, Arild Fitjar Waage (Sebastian T. Thomassen 81.), Emil Fitjar, Nils Ingard Tislevoll, André Helland (Mats Westvik 75.), Helge Træet (k), Øyvind Fykse Lie, Torbjørn Korsvik, Badi Hurasi, Jonas Tislevoll (Marius Helland Storebø 81.), Thomas Vestbøstad Waage (Jonas Aleksandersen 85.).