Thomas V. Waage avgjorde kampen mot Erdal med ei fin scoring i første omgang. Arkivfoto FP/KR. 

Kjærkomen bortesiger til A-laget

Fredag kveld har Fitjar sine beste fotballmenn vore på Askøy og fått med seg tre kjærkomne poeng etter 1-0 over Erdal.

Det er ein relativt nøgd Fitjar-trenar me har på tråden frå ferja i kveld. Laget hans har nett sikra seg sin andre bortesiger for sesongen, slik at dei ikkje sakkar så altfor mykje akterut på tabellen i 5. divisjon.


Unge Jacob Mehammer heldt buret reint i den første sereiekampen sin for A-laget. Arkivfoto FP/KR.

Kampen blei avgjort på ei scoring av måljeger Thomas V. Waage allereie etter fire minutt. Trenaren fortel om ein solid førsteomgang av Fitjar, medan det gjekk litt tyngre etter pausen. I første omgang var det aldri farleg framfor keeperdebutant Jacob Mehammer. Gutane til Kjell hadde god kontroll bakover, men sleit med utteljingane. – Me kunne like gjerne ha leia med 4-0 til pause, meiner Fitjar-trenaren.

Heller ikkje i kveld såg gutane hans ut til å ha godt av pausen. Straks dei kom utpå i andre omgang, fall kvaliteten på spelet til Fitjar. Heimelaget pressa høgare, og Fitjar hadde nok med å forsvara seg. Direkte farleg var det berre ein gong, men då ordna den unge keeperen Jacob Mehammer opp.

Spelemessig var kveldens kamp noko av det betre for Fitjar, og trenaren er spesielt nøgd med den defensive delen av spelet. Midtbanen med Øyvind Fykse Lie og Kjell André Thorland i spissen kom òg bra frå kampen. Det same gjorde Lars Fitjar Waage, heilt til han måtte gå ut med ein skade. Etter eit par rundkast, landa han på skuldera og måtte på sjukehus med smerter. Det skal ikkje vera brot, etter det trenar kjenner til.

Med kveldens trepoengar heng Fitjar brukbart med på midten av tabellen i 5. divisjon. – Men etter det eg såg i kveld, er Erdal eit av dei laga me bør ha bak oss om me skal overleva i divisjonen, seier Kjell Træet. No ventar ei rekkje knokkelkampar mot lag på nedre halvdel. Dei fire neste kampane meiner trenaren Fitjar-gutane bør vinna. 

Erdal – Fitjar 0-1 (0-1)
Erdal idrettsplass, kunstgress
fredag 13. mai kl. 19.15
seriekamp 5. divisjon avd. 3 Hordaland

Mål: 0-1 Thomas Vestbøstad Waage (4)

Dommar: Marcus Arildsen, Kjøkkelvik IL

Fitjar sitt lag: Jacob Mehammer, Emil Fitjar (Sander Tverborgvik 77), Helge Træet (k), Nils Ingard Tislevoll, André Helland, Øyvind Fykse Lie, Kjell André Thorland, Lars Fitjar Waage (Torbjørn Korsvik 67) Badi Hurasi (Mats Westvik 29), Jonas Tislevoll (Marius Helland Storebø 89.), Thomas Vestbøstad Waage.