Alejandro Rojo og målscorar Sebastian T. Thomassen inne i feltet til gjestene. Foto: Kjetil Rydland.

Juniorlaget opna med siger

Juniorlaget til Fitjar vann første seriekampen sin for sesongen då dei slo Stord Fotball 2 med 2-0 heime på kunsten søndag kveld.

Fitjar er meldt på i 3. divisjon med eit svært ungt lag, der mange er gutespelarar. I dagens møte med Stord 2 stilte dei med ein 97-modell, to frå 98 og fem frå 99-årgangen. Resten er gutespelarar, frå 2000 eller yngre.

Dagens motstandar frå Stord er i snitt eit par år eldre enn gutane våre, men det såg ikkje slik ut på kampen. Dei unge Fitjar-gutane greidde seg bra i duellane, og etter ein litt rotete førsteomgang, tok dei kontroll etter pausen, og vann 2-0.

Scoringane kom ved Sebastian T. Thomassen etter fire minutt i andre omgang og ved Marius Storebø tre minutt før slutt. Spesielt det siste målet var ei perle. Marius såg at Stord-keeperen stod langt ute, og løfta kontrollert ballen over keeper og i mål frå rundt 25 meters hald.

Trenar Kjell Træet seier seg nøgd med kampen og resultatet, spesielt andre omgang, der spelarane hans viste seg sterkare enn dei noko eldre gjestene frå Stord.

Fitjar sitt lag: Ruben Træet, Svein Arne J. Raunholm, Sigve Hjelmen, Sander Tverborgvik, Børge Koløen, Johannes Myhre, Rolf Solli, Arild F. Waage, Carlos Alejandro Rojo Alcalá, Marius Helland Storebø, Sebastian Tuftleland Thomassen. Innbytarar: Jonas Aleksandersen, Torstein Raunholm Kjelling, Markus Helland Tislevoll og Daniel Skarpnes.