Slo dei nest beste frå Austevoll

Fitjar sine beste menn på fotballbanen vann 3–1 over Austevoll 2 heime på kunstgraset tysdag kveld.

Gjestene frå Austevoll skal til liks med Fitjar sitt A-lag spela i 5. divisjon i år. Det såg lenge ut til at Austevoll sine nest beste var meir enn gode nok til å hamla opp med Kjell Træet sine aller beste menn. I første omgang hadde dei eit lite overtak, og tok leiinga allereie åtte minutt ut i kampen. Paal Mangor-Jensen slapp altfor lett gjennom eit tett befolka, men passivt Fitjar-forsvar, og heada i mål frå kort hald etter corner. Men Fitjar utlikna på ein liknande situasjon eit kvarter seinare, då Frode Malkenes fekk gå opp og uhindra heada inn 1–1.


Badi Hurasi avgjorde kampen mot toarlaget frå Austevoll, med eitt mål og ein assist. Foto: Kjetil Rydland.

I andre omgang var Fitjar eit strå kvassare enn gjestene frå nord. Litt meir rutine og fysisk styrke enn dei unge austevollingane kunnne varta opp med blei nok avgjerande. 20 minutt ut i omgangen avanserte Badi Hurasi fint inn i AIK-feltet, og sette ballen i nettet frå 12–15 meters hald. Same Badi la ei stund seinare fint inn til Thomas V. Waage. Storscoraren hadde etter kvart pussa litt rust av skorne, og plasserte ballen kjapt og elegant i nettet frå kort hald, bak den lovande AIK-keeperen Knut Ove Hage.


Thomas V. Waage i kjent stil konstaterer at ballen går i mål. Foto: Kjetil Rydland.

Om dette er dei nest beste Austevoll har å visa fram, er det klart at dei har bra med gode fotballspelarar å ta av nordom fjorden. På eit litt frostig heimelag var det Kjell André Thorland som varma mest i den kalde nordavinden. Elles er det kjekt å sjå at unge menn som Jonas Aleksandersen, Marius Storebø, Svein Arne Raunholm og Jacob Mehammer klarer seg bra på dette nivået.

KAMPFAKTA:

Fitjar–Austevoll 2: 3–1 (1–1)
Treningskamp Fitjar Idrettsplass, kunstgraset
Tysdag 29. mars kl. 17.30
Fitjar sitt lag: Ruben Træet (Jacob Mehammer 46.), André Helland, Emil Fitjar, Sander Tverborgvik (Svein Arne Raunholm 80.), Johannes Myhre, Torbjørn Korsvik (Mats Westvik 65.), Kjell André Thorland, Jonas Aleksandersen (Marius Storebø 65.), Jonas Tislevoll, Badi Hurasi og Frode Malkenes (Thomas V. Waage 46.).