Roger Træet kretsmeister i bridge

Roger Træet viste på nytt at han er den beste bridgespelaren i distriktet vårt då han gjekk heilt til topps i KM-par i dag.

Kretsmeisterskapet gjekk av stabelen i Nordhuset rett utanfor Haugesund i går og i dag. Saman med makker Stig Gamlemshaug frå Os gjennomførte Roger Træet 72 spel, og vann med ein sigersmargin på mindre enn eitt stikk!

– Men det er nok for meg, seier ein fornøgd Roger til Fitjarposten i kveld.

Han fortel at dei fekk ein flying start i går då dei slo Lars Rydland og Birger Pedersen i det aller første spelet. Då låg dei heilt i toppen i turneringa, men utover laurdagen gjekk det litt dårlegare. Derfor hadde dei fleire lag framfor seg søndag morgon. Men jamt bra spel utan altfor mange stygge feil gav siger til slutt med minst mogeleg margin.

Resultat frå turneringa kan du lesa på heimesidene til Norsk Bridgeforbund.

Med dagens siger kvalifiserte Roger seg til NM-par, som går av stabelen i Kristiansand i september. Men før det reknar han med å delta i dei tradisjonelle bridgeturneringane i Austevoll 1. mai og på Rubbestadneset Kristi himmelfartsdag.