Den ferske norgesmeisteren i djup konsentrasjon på heimebane i Øvrebygda. Foto: Kjetil Rydland.

Norgesmeister i bridge!

Fitjarbuen Roger Træet gjekk heilt til topps då NM i bridge for bedriftslag blei avvikla i Oslo helga som var.

Roger Træet er den beste bridgespelaren i mils omkrins, noko han har vist gong på gong. Eit nytt prov fekk me sist helg, då NM i bridge blei avvikla i Oslo, på Quality Hotel 33 på Økern. Her vann han bedriftsklassen med laget sitt, i skarp konkurranse med 11 andre lag. Dette er første gongen Roger har vore med på dette arrangementet, som har blitt avvikla i rundt 10 år.

Roger stilte for Apply i bedriftsklassen, saman med Jan Muri frå Bodø. Han kjem frå Bodø, men er kanskje mest kjend som solid midtstoppar på Rosenborg Ballklubb midt på 1970-talet. Dei to andre på firemannslaget til Roger er busette i Sør-Rogaland. Jan Fjælberg og Vetle Faag har Roger møtt før, men alle tre var nye makkerar for Roger. Dei var berre fire mann på laget, medan dei fleste laga stilte med seks mann, slik at to mann til ei kvar tid kunne kvila. Dermed blei det ei travel helg for Roger og dei nye makkerane hans.

Medan han spelar med lokale bridgeheltar på kjøkenet på Øvrebygda skule, tillèt Roger seg å gi eit lite intervju om den spanande bridgekonkurransen på Quality Økern 33 i Oslo laurdag og søndag. På startstreken stod 12 sterke lag, med tre verdsmeistrar og eit utal norgesmeistrar i bridge. Han er derfor ikkje så lite stolt over å gå heilt til topps i dette sterke feltet. Dei vann sju av dei 10 kampane sine, og måtte tola tre knappe tap.

Kamp nummer åtte blei vendepunktet. Då møtte dei Jernbaneverket, som låg på førsteplass. Her vann Apply 30-2, og gjekk opp i teten. Ekstra kjekt var det at nettopp denne kampen blei overført på BBO. På denne nettstaden kunne bridgefolk følgja den spanande kampen direkte. Sjølv om Roger og kompisane hans leid eit knapt nederlag i siste kampen, gjekk dei til topps til slutt.

Dermed kunne Roger og makkerane hans innkassera velfortent heider og ære som norgesmeistrar i bridge.

Fullstendige resultat frå NM kan du lesa på nettstaden bridge.no.


Bra frammøte då Roger spela bridge med lokale entusiastar på Øvrebygda skule onsdag kveld. Foto: Kjetil Rydland.