Unge seljarar med eit rikt utval juletre på Rydland i dag. Foto: Kjetil Rydland.

Juletre ved Joker Rydland

Øvrebygda 4H held oppe tradisjonen, og sel juletre ved filialen på Rydland.

Ved Joker-butikken på Rydland møtte me ein flokk unge juletreseljarar laurdag føremiddag. Julie Skår Solvang, Michelle Bod Solheim, Elise de Fine Olsen, Irmelin Havn og Elisabet Rydland Sæbø (ingressbiletet) kunne by på fine juletre av ulike sortar, norsk gran, serbergran, edelgran og fjelledelgran.

Dei dyraste er dei to typane edelgran, som kostar 500 kr per tre. Vanleg gran og serbergran kostar 400 kr, men om du ikkje er så kravstor, kan du kanskje finna deg eit tynt tre til 300 kr, seier dei unge seljarane.

Heldigvis var dei godt kledde, for vêret er meir enn surt nok, sjølv om den skikkelege vinteren lar venta på seg. Inne i lavvoen passa Lovise Bod på at det var fyr i omnen. Slik at juletreseljarane kunne laga varm kakao, som dei serverte kundane sine, til nysteikte vaflar.

Øvrebygda 4H reknar med å ha butikken open i morgon og kvar dag framover mot jul. Juletresalet er ei av dei viktigfaste inntektskjelene til 4H-klubben, og eit høgdepunkt for medlemmene. Det er kjekt å selja juletre!


– Er det folk i butikken? lurer Harald Rydland, og stikk hovudet inn i lavvoen. Foto: Kjetil Rydland.


– Her kan du betala med kort, seier Elisabet Rydland Sæbø. Foto: Kjetil Rydland.


Elise de Fine Olsen serverer kakao. Foto: Kjetil Rydland.


Vaflar både til kundar og seljarar. Foto: Kjetil Rydland.