Maken til sterke scener som den søte Hilma (Martin Hatlevik) og sjarmøren Roger (Alf Træet) stelte til, ville du aldri sett på NRK-programmet. I alle fall ikkje med den vanlege sendetida. Foto: Arne Vestbøstad

 

 – Den beste Norge Rundt-sendinga EVER

 

Orda kom frå ordførar Wenche Tislevoll då ho fekk ordet etter vel blåst premiere på Norge Rundt-kabareten til Osternes Mannskor.

 

 

Denne gongen hadde politikaren dei fleste i salen bak seg då ho la fram dette synspunktet. Har du ikkje fått billett, må du setja di lit til at det vert sett opp fleire framsyningar.

 

Når Osternes Mannskor byr på seg sjølv på den måten dei gjorde under årets og tidlegare års kabaretar, skal det godt gjerast å ikkje bli sjarmert. Ein fullsett sal responderte med fleire applausar og latterbyger undervegs, og gav ståande ovasjonar då det heile var omme.

 

«Sendinga» gjekk unna i eit høgt tempo, bortsett frå ein periode rett før pausen, då det blei litt kluss i nokre vekslingar, men det høyrer vel med under ein premiere. Under opningsinnslaget understreka koret at dei er amatørar, men det er sanneleg lett å gløyme når karane er på sitt beste, slik dei til tider var under denne kabareten. Her var det musikalske høgdepunkt frå den nasjonale viseskatten på rekkje og rad. Spennet i tid og rykte var omtrent frå Petter Dass til DDE, arrangert og tilpassa koret og lokale tilhøve av Svein Tørnquist og Ole Chr. Ottestad.

 

Bart og eit laust ratt i handa?! Dette må jo vera framføring av vømmølsongen Førarkort, med Tom Rydland som solist. Foto: Arne Vestbøstad

 

Det er ikkje verst å selja ut kultursalen to gonger på den måten mannskoret har gjort. Med allsong, typiske viser for dei ulike landsdelane, artige førehandsinnspelte videoar og gode solistar, fekk dei som hadde løyst billett skikkeleg valuta for pengane. Så dei som har billett til framsyninga laurdag har litt av kvart å gleda seg til.

 

 

Gode hjelparar

Det er blir mykje fokus på mannskoret, men dei skal jammen vera glade for at dei har med seg Gurid Refvik. Som forsongar til dei fleste avdelingane med allsong var ho god, men som solist var ho fantastisk. Også musikarane Heine Helland, Terje Træet, Harald Rydland og Svein Tørnquist gjorde sitt til at det endelege resultatet blei så bra.

 

 

Gurid Refvik og Martin Hatlevik under framføringa av Medaas-klassikaren 80 år. Foto: Arne Vestbøstad