Åsmund Sørfonn og Vestbøstad sikra seg den gjævaste pokalen etter fleire jamne kampar. Foto: Kjetil Rydland.

Jamne kampar i Fitjar Kraftlag Cup

Årets vintercup blei avvikla i uvanleg bra spelevêr, og ikkje uventa vann Vestbøstad herreklassen, medan Øvrebygda blei best i dameklassen.

Mange sterke lag stilte i årets store bygdecup på Fitjar, og turneringa blei meir jamspelt enn nokon gong. Øvrebygda vann den jamne dameklassen etter å ha vunne alle kampane sine. I finalen slo dei eit sterkt lag frå Dåfjorden med 4-1. Også i herreklassen var det mange gode lag denne gongen, og favorittane frå Vestbøstad måtte gjennom mange jamne kampar før dei kunne heva den store pokalen etter 2-1 mot Kalveid. Scoringane i finalen kom ved Mats Brakedal, den siste avgjorde kampen rett før slutt.

For dei tapande finalistane blei det ei historisk turnering; det er første gongen sidan 1992 dei kom seg til A-sluttspelet i vintercupen. Dette var kanskje ein aldri så liten skrell, men med ein god keeper er det alltid mogleg å nå langt i slike turneringar. Den største skrellen i herreklassen råka Fitjarstølane, som var blant favorittane i år. Med fleire lovande ungdommar på laget gjekk dei på to tap i innleiinga, og enda i B-sluttspelet.

Som vanleg var Ole Bergesen stødig cupgeneral, med god hjelp av Rune Brakedal og unge hjelparar i kiosken. Han er godt fornøgd med avviklinga av årets vintercup. Einaste skår i gleda var ein skade; ein av veteranane i herreklassen måtte tilbringa ei natt på sjukehus etter brot i kinnbein og eit kutt over auga. Vonleg vil eit par veker med ro gjera godt for den uheldige.

Med årets cup i boks har Fitjar Idrettslag avvikla turnerneringa etter same mal samanhengande i 24 sesongar på rad. Neste år blir den 25. vintercupen i rekkja for Fitjar IL og Ole Bergesen. Han har allereie retta blikket framover mot neste sesong, og jubileum for Fitjar Kraftlag Cup.


Glade gutar frå Kalveid har sikra seg plass i A-sluttspelet for første gong i historia, og klarer ikkje å venta på keeperen sin før dei ber om fotografering. Foto: Kjetil Rydland.


Øvrebygda-keeper Rachel Helland gjorde alt for å sikra laget sitt finaleplass i vintercupen. Foto: Kjetil Rydland.


Ole Bergesen hadde som vanleg stålkontroll under årets vintercup. Foto: Kjetil Rydland.


Carsten Rasmussen reddar straffe i kampen for å unngå sisteplassen. Foto: Kjetil Rydland.


Ikkje alle klarte å få med seg alle resultata. Foto: Kjetil Rydland.


Geir Bjarte Hatlevik var som vanleg på plass som stødig dommar. Foto: Kjetil Rydland.


15-åringane Torstein R. Kjelling og Markus Tislevoll debuterte med kvar si scoring i første kampen sin, men måtte etter kvart innsjå at det ikkje gjekk vegen for Fitjarstølane. Foto: Kjetil Rydland.