Corona jubilerer

 

Koret Corona er i år 10 år. Det markerer dei med to jubileumskonsertar. Med seg får dei Osternes Mannskor. 

– Damekoret Corona blei starta opp i 2005 av ein gjeng songglade damer frå Stord og Fitjar, og har dermed 10-årsjubileum i år. Førstkomande helg blir det markert med to jubileumskonsertar. Den første, lørdag 24. oktober, blir i Fitjar, i Kultursalen på Fitjar kultur- og idrettsbygg, den andre, søndag 25. oktober, i konsertsalen på Stord vidaregåande skule. På begge konsertane er Osternes mannskor gjester, og dei vil krydra konserten med sine musikalske innslag. Begge konsertane startar kl. 17.00, skriv dei i ei pressemeding til fitjarposten.no.

Repertoaret til Corona er eit utval av både klassisk, populærmusikk og jazz. Dei  har delteke i korkonkurransar i både inn- og utland og nådde eit høgdepunkt med siger i dameklassen i «Syng for oss» i Grieghallen i Bergen i 2012.

I dag består koret av 17 koristar, og har sidan hausten 2014 hatt Irene Simonsen som dirigent.

Namnet Corona betyr å stråle og å omkranse, noko som samsvarer godt med koret sitt mål om å formidle songglede, vakre tonar og fin klang ut til publikum.

Vidare har Corona ofte hatt korkafear med flotte kakebord, og denne helga er ikkje noko unntak. Inkludert i billetten vert det rett etter konserten servert festkaker for å feira ti gode år, og me ser fram mot mange fleire!