Ikkje mykje å gle seg over på Fitjar-benken under dagens serieavslutning mot Bremnes. Foto: Kjetil Rydland.

Fitjar rykkjer ned etter tap for Bremnes

A-laget til Fitjar rykkjer ned til 5. divisjon etter 1-2 mot nedrykksklare Bremnes heime i Fitjar Idrettspark laurdag ettermiddag.

Med siger over nedrykksklare Bremnes i den siste seriekampen kunne Fitjar halda liv i det vesle håpet om ny kontrakt i 4. divisjon. Men det viste seg snart at dei var heilt sjanselause. Bremnes hadde ingen ting å spela for i det vakre haustvêret i dag, men det var det ingen som kunne sjå. Dei kjempa med dødsforakt, og vann heilt fortent over Fitjar, som dermed må slå følgje med Bremnes ned i 5. divisjon.


Bremnes scorar sjølvmål etter å ha blitt forstyrra av Mats Westvik, og Fitjar augnar eit lite håp om poeng. Foto: Kjetil Rydland.

Som så ofte før gjekk sigeren til det laget som hadde mest lyst til å vinna, og litt overraskande var det Bremnes. Dei gjekk ut i stort tempo, var aggressive i duellane, og hadde dei fleste målsjansane. Allereie etter sju minutts spel kunne det stått 1-0 til gjestene, men keeper Aleksander Henriksen fekk ei hand på ballen.

Fitjar hadde meir enn nok med å forsvara seg, og etter vel 25 minutts spel var det klart for 1-0 til Bremnes. Jonas B. Håstø skaut eit ikkje altfor godt skot frå 25 meters hald, men det var godt nok til å gå over Fitjar-keeperen, som stod for langt ute. Og fem minutt før pause burde det stått 2-0 til Bremnes. Erlend Meling Nesse blei lagt ned i feltet av Jonas Tislevoll, men verken ein godt plassert assistentdommar eller hovuddommar Kristoffer Hagenes såg det som alle bremnesingane på Fitjar såg. Dermed kunne Fitjar gå til pause med berre 0-1.

I pausen kom den «legendariske» Lars Fitjar Waage inn for Helge M. Træet på midtbanen, og han markerte seg straks med eit fint raid som nesten lukkast. Og eit par minutt seinare sette Thomas Vestbøstad Waage ballen i Bremnes-målet etter fint angrepsspel av Fitjar. Men målet blei korrekt annullert for offside. Dette var dei beste forsøka frå Fitjar si side i denne kampen, og dei måtte ha hjelp av gjestene for å få ballen i mål. Etter 20 minutt av andre omgang avanserte Badi Hurasi fint på venstresida og slo inn til Mats Westvik, som ikkje fekk tak i ballen. Men Bremnes-forsvararen var uheldig og kløna ballen i eige mål.

Med 1-1 breidde det seg ein smule glød i Fitjar-spelarane, men det skulle snart visa seg at bremnesingane ikkje ville sleppa Fitjar inn att i kampen. Dei var tydelegvis innstilte på å gi alt for å få Fitjar med seg ned i 5. divisjon. Bremnes fekk corner, og Magnus B. Håstø storma gjennom feltet før han heada ballen uhindra i mål frå kort hald. Dermed kunne Bremnes innkassera tre velfortente poeng.

Dagens Fitjar-spelar blei Nils Ingard Tislevoll, ei hyggeleg oppmuntring for ein mann som kom seint i gang med årets sesong. Men elles var det langt mellom lyspunkta på eit litt bleikt Fitjar-lag i serieavslutninga.

No er det klart at det blir 5. divisjon for Fitjar til neste år. Det hadde uansett ikkje hjelpt med siger over Bremnes i dag, for nedrykksrival Trio vann sin kamp mot Nordhordland på Knarvik. Men ei god avslutning på ein brukbar haustsesong hadde nok vore betre å ta med seg inn i vinterdvalen.

No måtte spelarane og publikum svelgja tap mot eit ferdig nedrykt Bremnes, i ein kamp der spelarane burde vist meir glød og innsats. Til avslutning blei alle inviterte inn på marsipankake, spandert av Spar Fitjar. Vonleg gjorde den det litt lettare å svelgja det stusselege tapet.

KAMPFAKTA

Fitjar – Bremnes 1-2 (0-1)
Seriekamp 4. divisjon avd. 02
Laurdag 17. oktober 2015 kl. 15.00
Fitjar Idrettspark
Publikum: 160
Dommar: Kristoffer Hagenes, TIL Hovding

Mål: 0-1 Jonas B. Håstø (25), 1-1 sjølvmål (75), 1-2 Magnus B. Håstø (81)

Fitjar sitt lag: Aleksander Henriksen, Emil Fitjar (Svein Arne Raunholm 89), Nils Ingard Tislevoll, Torbjørn Korsvik, Sander Tverborgvik (Mats Westvik 70), Helge Myrmel Træet (Lars Fitjar Waage 46), Kjell André Thorland, Øyvind Fykse Lie, Jonas Tislevoll (Mats Brakedal 56), Badi Hurasi, Thomas Vestbøstad Waage (Arild Fitjar Waage 89).