Pokaldryss over Fitjar skulekorps
Fitjar skulekorps stakk av med både solistprisen, 1. plassen i 3. divisjon brass og vandrepokalen under Sotrafestivalen i helga.
Juniorkorpset fekk domarane til å både smila, le og klappa under framføringa av Skrekkfilm.
Juniorkorpset, under leiing av Svein Roger Koppang, fekk skryt av domarene både for rockestemninga, bluesstemninga og skrekkfilmstemninga dei skapte.
Lett nervøs stemning i Fitjar skulekorps sitt klasserom like før dei skal på scenen.
Althorn, baryton og euponium-rekkja, med Ragnhild Prestbø på vingen.
Anne Lunde med nydeleg kornettsolo på Elegy.
Det var trangt i konkurranselokalet og mange som ville høyra på, så publikum sat nesten oppå korpset.
Fitjar skulekorps, med sin dirigent Svein Roger Koppang, framfører The Hidden Soul of Harmony.
Juniorane mottok stolt deltakarmerke og diplom under premieutdelinga i Bildøyhallen.
Meir om Sotrafestivalen 2011 og fullstendig resultatliste kan du finna her.
Skulekorpset skulle delta med både juniorkorpset og hovudkorpset i korpskonkurransen Sotrafestivalen som fann stad på Fjell laurdag 19. november. Det var ein trøtt korpsgjeng som møttes til frukost på ferja over Bjørnefjorden.
Først ute på Sotra var juniorkorpset, som denne dagen bestod av sju førsteårs juniorar, fem andre års juniorar og fem seniorar. Skremmande bra, kult, stemningsfullt og solid var domarane Eigil Magnussen og Bengt Florvåg sin kommentar etterpå. Korpset framførde 1 og 2 og 3 og 4 Råkk, Skrekkfilm, Norwegian sunset og Lilla Blues. Juniorkorpsa vart ikkje rangert, men fekk fyldige domarakommentarar og deltakarmerke og diplom etterpå. I kommentarane til domarane kunne ein lesa at juniorkorpset fekk skryt for flott innmarsj, presist og rytmisk spel, kontrollert dynamikk, god artikulering, fine kontrastar og fin klang. I tillegg til at gruppesoloane vart trekt fram som gode vanka det og ekstra skryt til slagverk og tuba. Domarane takka for ein flott konsert og avslutta med å sei at juniorkorpset til Fitjar skulekorps har flott besetning med solid klangbotn og at dei framførde eit variert program på ein stødig og stilfull måte.
Etter litt mat, avslapping, handling for nokon sin del og lytting til andre korps var det Fitjar skulekorps sin tur. Korpset stilte i 3. divisjon brass med spesialkomponert stykke og 32 strålande blide musikkantar. Dei framførde The Hidden Soul of Harmony, komponert for Fitjar skulekorps av iren Richard Rock. Stykket består av fire satsar: Salsa, Baltic Dance, Elegy og Jamboree. Domarane likte det dei høyrde og skrytte av stykket og den sikre framføringa. I kommentaren sin skreiv dei at korpset synte musklar allereie frå starten. Korpset hadde bra samspel, dei var tydelege rytmisk, dynamisk var det veldig bra, dei hadde fint driv og god kontroll. Dirigenten fekk skryt for tydeleg direksjon, alle gruppesoloar og solistar fekk skryt, euphonium vart fleire gongar trekt positivt fram og det vanka ekstra skryt til kornettrekkja og då ikkje minst bakrekkja. I sats tre var Anne Lunde solist på kornett. Her fekk korpset skryt for varmt, fint og kontrollert komp og om Anne si speling hadde dei skrive nydeleg klang og fin kontroll. Publikum, med stor overvekt av patriotar frå Fitjar, sat med bankane hjarter, tårevåte auger og gåsehud under framføringa, og gav korpset spontant ståande applaus etter siste tone.
Om kvelden var det festkonsert med Rong brass og premieutdeling. Det var knytt stor spenning til plasseringa. Fitjar skulekorps, som nykomera, stakk heilt uventa av med sigeren i 3. divisjon brass i Sotrafestivalen 2010. Korleis ville det gå i år? Musikkantane hadde prestert sitt aller, aller beste og dei hadde vist svært stor musikkglede på scenen. Første annonserte siger til Fitjar var solistprisen i 3. divisjon brass som gjekk til kornettist Anne Lunde. Så synte det seg at det ikkje berre var patriotane som syntes at Fitjar var best. Med 94 poeng for det musikalske og 9 poeng for programmet kom korpset opp i 103 poeng totalt og mottok, til stor jubel i den grønkledde leiren, første plassen i 3. divisjon brass. 103 poeng var den høgaste poengsum nokon som deltok i årets konkurranse fekk, uavhengig av klasse, og såleis fekk og Fitjar skulekorps eit napp i vandrepokalen. Heile korpset var eit stort smil då dei gjekk ut frå Bildøyhallen etter premieutdelinga. Er det mogleg å smila breiare, undra eg. ” Då måtte me hatt større ansikt”, kom det kjapt frå ein smilande 12-årig musikkant, og større ansikt, ja det har jo både dirigenten, leiaren og alle foreldra...
