Skeisemedaljar til Fitjar
Både Harald og Onar Westerheim henta heim skeisemedaljar under NM for veteranar på Valle Hovin i Oslo i helga.
Harald og Onar får framleis fart på skeisene.
Harald slo til med ein sterk 3000m med tida 5.10.21. Det heldt til ein sterk sølvmedalje. Onar oppnådde fire bronsemedaljar, og hadde desse resultata: 500m: 45.28 (bronse), 1000m 1.31.67 (4.-plass), 1500m 2.24.02 (bronse) og 3000m 4.59.69 (bronse). Han fekk òg bronse samanlagt.
- Stemnet samla rundt 75 deltakarar frå Tromsø i nord til Arendal i sør. Dei fleste deltakarane er i alderen 50 til 70 år. Det vart konkurrert i fem årsklassar, og det kan vera ein fordel å vera yngst i klassen. Det vert kåra NM-meistrar på einskilddistansar og samanlagt, og laurdag var alle samla til bankett, der "Kuppern" Johannesen var med, fortel Onar Westerheim.
Frå Stord deltok fire løparar: Onar Westerheim i klassen 60-64 år og Harald Westerheim, Jan Henriksen og Frank Einar Pedersen i klassen 65-69 år. Jan og Frank gjorde fleire gode prestasjonar, men nådde ikkje opp på pallen i den tøffe konkurransen i klassen. Med minimalt med istrening så langt var resultata likevel i overkant av det me kunne venta.
- No ser me fram til nye konkurransar både i inn- og utland. VM-Veteran sprint går i Heerenveen i slutten av februar medan allround-meisterskapen finn stad i Erfurt første helga i mars. I tillegg er det Veteranløp i Inzell og Berlin. I alle desse løpa vil det vera lokal deltaking, seier Onar Westerheim til slutt.
